नेपाल प्रहरीमा डीआईजीहरुको सरुवा तयारी

२ असार, काठमाडाैं । गृहमन्त्रालयले नेपाल प्रहरीमा डीआईजीहरुको सरुवा तयारी गरेको छ । सरुवाको एक वर्ष अवधि पुगेका डीआईजीहरुलाई सरुवा गर्न लागिएकाे हो । प्रदेश प्रहरी कार्यालय र प्रहरी प्रधान कार्यालयमा रहेका डीआईजीहरुलाई सरुवा गर्न लागेको प्रहरी प्रधान कार्यालय स्रोतले जनाएको छ ।

डीआईजी सरुवाकै विषयमा मंगलबार गृहमन्त्री खगराज अधिकारी, गृहसचिव महेश्वर न्यौपाने, प्रहरी महानिरीक्षक शैलेश थापा क्षेत्रीले छलफल गरेको भएपनि उनीहरुबीच खासै सहमति हुन सकेको छैन् । सरकारले निर्वाचन समेत घोषणा गरेका कारण त्यसलाई समेत ध्यानमा राखेर डीआईजीदेखि एसएसपीहरुको सरुवाको तयारीमा गर्नुपर्ने मन्त्रालयको धारणा छ ।

मन्त्रीसहित गृहसचिव महेश्वर न्यौपाने र आईजीपी थापा डीआइजीहरुको सरुवाको विषयमा छलफलमा जुटेका भएपनि मंगलबार खास निर्णय भएको छैन । तर प्रहरी प्रधान कार्यालयले केही दिनमै सरुवा गरिहाल्ने तयारी थालेको छ । प्रहरी प्रधान कर्यालयले नेपाल प्रहरीको प्रदेश र एक वर्ष बढी अवधि पुगेका जिल्लाका प्रहरी नेतृत्वको सरुवा गर्न लागेको हो । अहिले सबैजसो प्रदेशमा डीआइजीहरुको सरुवा अवधि कटिसकेको छ ।

प्रदेश कार्यालय प्रमुख रहेका डीआइजीहरुको अवधि १४ महिना पुगेको छ । ८ वैशाख २०७७ मा सरुवा भएका डीआईजीहरुको सरुवा गर्नुपर्ने भएपनि प्रहरी प्रधान कार्यालयले कोरोना संक्रमणको कारण देखाएर सरुवा गर्न सकेको छैन । उनीहरु अहिले सरुवा लागि प्रहरी प्रधान कार्यालयलाई ताकेता गरिरहेका छन् । डीआईजीहरुको सरुवा लगत्तै एसएसपी, एसपी र डीएसपीहरुको सरुवा हुनेछ ।

हाल संघीय प्रहरी कार्यालयका एसएसपीहरु, एसपीले कमाण्ड सम्हालेका जिल्लाहरु मोरङ, सुनसरी, दाङ, कैलाली, बाँके, कास्की, काठमाडौका कतिपय वृत्तहरु र अर्घाखाँची, भोजपुर, संखुवासभा, खोटाङ लगायतका जिल्ला प्रमुखहरुको सरुवा हुने बेला भएको छ । त्यसैगरी प्रशासन, मुद्धा शाखा, जिल्लामा एसपीको सहायक भएका डीएसपीहरुको पनि सरुवा हुने बेला भएको छ ।

प्रहरी प्रधान कार्यालयले प्रदेश १ का डीआइजी ईश्वरबाबु कार्कीलाई प्रधान कार्यालयमा सरुवाका तयारी गरेको छ । त्यहाँ सीआईबीमा रहेका सहकुल बहादुर थापा वा अख्तियारमा रहेका अरुणकुमार बिसी मध्ये एकजनालाई पठाउने तयारी गरेको हाे । त्यस्तै दिवेश लोहनीलाई प्रदेश २ मा पठाउने तयारी गरेको भएपनि लोहनीले प्रदेश २ मा जान आनाकानी गरेपछि थापाकाे सरूवा हुने अवस्था छ । प्रदेश २ मा कार्यरत धीरजप्रताप सिंहलाई सीआईबीमा सरुवा गर्ने तयारी गरेको छ ।

लोहनीले प्रदेश १ जान चाहेको भएपनि उनलाई बाग्मती प्रदेश पठाउने तयारी गरिएको छ । गण्डकी प्रदेशमा डीआईजी प्रकाशजंग कार्की, लुम्बिनीमा मुकुन्द आचार्य, कर्णालीमा गणेश ऐर र सुदूरपश्चिममा डा. देवबहादुर बोहोरालाई पठाउने तयारी भैरहेको स्रोतले जनाएको छ । त्यस्तै सीआईबीमा प्रबन्धका पुरुषोत्तम कँडेलले जाने रहर गरेको भएपनि उनलाई अख्तियारमा पठाउने तयारी गरेका छन् ।

प्रबन्धमा रहेका एसपी प्रेम बस्नेत पनि कँडेललाई अख्तिार पठाउनुपर्छ भन्दै लविङ गरिरहेका छन् । एसपी बस्नेत पहिला अख्तिायरमै बसेर प्रबन्धमा आएका हुन् । सीआईबीमा उत्तम सुवेदीले पनि जान चाहेका छन् । लुम्बिनीका रविन्द्र धानुकलाई प्रहरी प्रधान कार्यालय सरुवा गर्ने तयारी भएको छ । उनलाई दाङका क्रसर उद्योगहरु संरक्षण गरेको आरोप लागेको छ ।

त्यसैगरी काठमाडौ उपत्यकाका वृत्तहरुमा कार्यरत डीएसपीहरुको पनि सरुवा तयारी भएको छ । बौद्धमा नवीन कार्की, महाराजगन्जमा रोशन खड्का, वानेश्वरमा दक्षबहादुर बस्नेत, अनामनगरका हरिबहादुर बस्नेत तथा निराजनदत्त भट्ट, नेपाल प्रहरी अस्पतालका प्रशासन प्रमुख प्रेमसागर केसीको सरुवा तयारी भएको छ ।

उनीहरुको एक वर्ष अवधि पुगेका कारण सरुवा तयारी भएको हो । त्यस्तै कास्कीका जीवन श्रेष्ठ, मोरंगका सन्तोष खड्का लगायतका एसपीहरुको पनि सरुवा तयारी भएको छ । एक वर्ष अवधि पूरा भएका डीएसपीहरुको सरुवापछि प्रहरी प्रधान कार्यालयले असार भित्रै प्रहरी निरीक्षकहरुको पनि सरुवा गर्ने भएको छ ।