सर्वाेच्चलाई ओलीको जवाफ, वैकल्पिक सरकार नबन्ने देखेकाले विघटन

३ असार, काठमाडौं । प्रधानमन्त्री केपी ओलीले प्रतिनिधिसभाले नयाँ सरकार बनाउने अवस्था नरहेको भन्दै वाध्य भएर विघटन गरेको दाबी गरेका छन् । सर्वाेच्च अदालत समक्ष आफ्नो लिखित जवाफ पेश गर्दै प्रधानमन्त्री ओलीले यस्तो दाबी गरेको हो ।

सर्वाेच्चको संवैधानिक इजलाशले यही असार ८ गते भित्र प्रतिनिधिसभा विघटन सम्बन्धी रिटमा लिखित जवाफ फर्काउन प्रधानमन्त्रीको नाममा आदेश जारी गरेको थियो ।

महान्याधिवक्ता कार्यालयमार्फत प्रधानमन्त्री ओलीले आज फर्काएको लिखित जवाफमा एमालेकै केही सांसद्ले प्रतिपक्षी दलका नेता शेरबहादुर देउवालाई गरेको समर्थन संविधान विपरित रहेको समेत उल्लेख गरेका छन् ।

विपक्षी दलका नेताले जेठ ७ गते सम्मानीय राष्ट्रपति समक्ष पेश गरेको नामावलीमा एमाले र जनता समाजवादी पार्टीका सांसद्को समेत नाम राख्नु संसदीय मूल्य मान्यता र संविधानको अक्षर भावना विपरित रहेको भन्दै त्यस्तो गैर राजनीतिक कृयाकलापले संसदीय व्यवस्था नै धरापमा पार्ने पनि ओलीले तर्क गरेका छन् ।

कांग्रेस सभापति देउवाका मुन्तिर नाम राखिएका एमाले र जसपा सांसद्को हैसियत र परिचयसमेत नखुलेकोले त्यसको संवैधानिक मान्यता शून्य हुने ओलीले उल्लेख गरेका छन् ।