आलोचना र विवादमा तानिदै प्रदेश प्रमुख अहिराज  

४ असार, काठमाडौं ।  प्रदेश नम्बर दुई का प्रदेश प्रमुख राजेश झा ‘अहिराज’ विवादमा तानिएका छन् । उनका पछिल्ला भूमिका एवम् गतिविधिहरु सन्तुलित, निष्पक्ष नदेखिएको र पदीय मर्यादालाई कायम राख्न नसकेको भन्दै  प्रदेश भित्र उनको आलोचना सुरु भएको हो ।

सामान्य रूपले अलंकारिक भूमिकामा रहनु पर्ने संघीय सरकारको मुख्य प्रतिनिधिका रुपमा रहेका प्रदेश प्रमुख अहिराज कहिले अनुगमनमा निस्कने  त कहिले मुख्यमन्त्रीलाई मन्त्रीपरिषद विस्तार संवैधानिक नभएको भनि पत्र पठाउन थालेपछि विवादमा तानिएका हुन् ।

विद्यालय, बजार अनुगमन, मास्क वितरण प्रदेशप्रमुखको काम भित्र नपर्ने भन्दै स्थानीय वुद्धिजीवीहरुले अहिराजका गतिविधिले प्रदेश प्रमुखको पदिय मर्यादा सम्मान गर्न नसकेको टिपणी गरेका छन् ।

मुख्यमन्त्री विवादित बन्दै जादा लालबाबु राउतले गरेको मन्त्रीपरिषद विस्तार विरुद्ध उनले मुख्यमन्त्री लालवावु राउतलाई पठाएको स्मरण पत्रको प्रदेश सरकारले जवाफ दिन आवश्यक नै ठानेन् । उनको त्यो पत्र केवल मिडिया प्रचारबाजीको चाहान अनुसार आएकोले प्रदेश सरकारले त्यसको जवाफ दिन आवश्यक नठानेको मुख्यमन्त्री  राउतका प्रमुख स्वकीयसचिव जितेन्द्र यादवले बताएका छन् ।

मुख्यमन्त्री राउतले केही दिनअघि गरेको मन्त्रिपरिषद् विस्तार समावेशी नभएको भन्दै प्रदेश प्रमुख अहिराजले स्मरण पत्र पठाएका थिए । उक्त पत्र पठाएपछि उनी झनै विवादमा तानिएका हुन ।

त्यसो त पछिल्लो पटक ओली सरकारले नियुक्ति गरेका लुम्विनी र गण्डकी प्रदेशका प्रदेश प्रमुखका काम कारवाहीहरु पनि विवादरहित बन्न सकेका छैनन् ।