उपेन्द्र पक्षले माग्यो आधिकारिकता

४ असार, काठमाडौं । पार्टी आधिकारिकताको माग गर्दै जनता समाजवादी पार्टीका अध्यक्ष उपेन्द्र यादव निर्वाचन आयोग जाने तयारीमा छन् । यस प्रयोजनका लागि आजै आयोग जाने बताइएको छ ।

नेताहरु अहिले बालकुमारीस्थित पार्टी कार्यालयमा भेला भएका छन् । दुई बजेसम्म आयोग पुग्ने तयारी गरिएको केन्द्रीय कार्यकारिणी परिषद सदस्यसमेत रहेका नेता मोहमद इस्तियाक राइनले बताए ।

यसअघि पनि पार्टी अनुशासन र हित विपरित केपी ओली सरकारमा सहभागी भएको भन्दै महन्थ ठाकुरसहित चारजना नेतालाई कारबाही गरिएको पत्र आयोगमा बुझाइएको थियो । तर आयोगले दुबै पक्षले गरेको कारबाही अमान्य भन्दै पुरानै कार्यसमिति यथावत रहेको निर्णय गरेको थियो ।

उता, महन्थ ठाकुर पक्षले एक पक्षीय रुपमा कार्यसमितिबाट उपेन्द्र पक्षका २० जना केन्द्रीय कार्यकारिणी सदस्य हटाएर आफूनिकटलाई नियुक्त गरेका छन् । सोही बमोजिमको पत्र उनले पनि आयोग समक्ष बुझाइ सकेका छन् ।