ओली खेमामा लागेकाहरु भौंतारिंदै

४ असार, काठमाडौं । प्रतिनिधिसभा पुनस्थापनाको सम्भावना बलियो देखिएपछि पूर्व माओवादी नेताहरु पद बहालीको सम्भावनाबारे कानूनी परामर्शमा जुटेका छन् । माओवादी केन्द्रबाट निर्वाचित लेखराज भट्ट, टोपबहादुर रायमाझी र प्रभु साह नेकपा विभाजनपछि अर्काे पार्टीमा समाहित भएपछि उनीहरु पदमुक्त भएका थिए ।

फागुन २३ गते सर्वाेच्च अदालतले नेकपा विघटन गरी एमाले र माओवादी केन्द्र व्यूँताइदिएपछि उनीहरु एमालेमै बसेका थिए । तर राजनीतिक दल सम्बन्धी कानूनले एउटा पार्टीबाट निर्वाचित प्रतिनिधि अर्काे पार्टीमा गएको अवस्थामा पदमुक्त हुने प्रावधान अनुरुप पदमुक्त भएका थिए ।

तर सर्वाेच्च अदालतले प्रदेशसभाका सदस्यहरुलाई धमाधम पुनबहाली गर्न थालेपछि उनीहरु पनि सक्रिय भएका हुन् । यस प्रयोजनका लागि प्रभु साहले विभिन्न कानून व्यावसायीहरुसँग परामर्श गर्न थालेका छन् । प्रतिनिधिसभा पुनस्थापना भएको अवस्थामा आफ्नो पद पुनस्थापना गर्न सकिने वा नसकिनेबारे उनीहरुले चासो राखेका छन् ।

आजै पनि रायमाझी र साह निर्वाचन आयोग पुुगेका छन् । उनीहरुले आयोगका कानून हेर्ने उपसचिबसँग करिब एक घण्टा छलफल गरेका थिए । प्रतिनिधिसभा पुनस्थापना भएको अवस्थामा आफ्नो पद फर्काउने कुनै सम्भावना रहे नरहेको भन्दै उनीहरुले जिज्ञाशा राखेका थिए ।