यार्सा टिप्न गएर सम्पर्कविहीन भएकाकाे उद्धार, तीनको स्वास्थ्यमा खराबी

४ असार, काठमाडौं । मनाङको फू लेकमा यार्सा टिप्न गएर अलपत्र परेका ५६ जनाको शुक्रबार उद्धार गरिएको छ । मनाङको उच्च हिमाली भेग नार्पाभूमि गाउँपालिकाको फू लेकमा यार्सा टिप्न गएका उनीहरु भारी वर्षापछि सम्पर्कविहीन भएकाकाे आज उद्धार गरिएको हो ।

मनसुन सक्रिय भएपछि निरन्तर वर्षाका कारण उनीहरु सम्पर्कविहीन भएको ४ दिनसम्म उद्धार हुन सकेको थिएन । आज उद्धार  गरिएकामध्ये तीन जनाको स्वास्थ्यमा खराबी देखिएको छ । सेनाकाे हेलिकप्टरले उच्च लेकबाट उद्धार गरेर उनीहरुलाई फू गाउँमा ल्याएको छ ।

आज बिहानैबाट मौसम खुलेकाले उद्धारमा सहज भएको छ । आज फू मा भएका ५६ जना, ताल्चे ५५ जना, ओडारमा २८ जनाको उद्धार गरिएको छ । यस्तै ताल गाउँका ३ जना अपाङ्गता भएकाहरुको पनि सकुसल उद्धार गरिएको छ ।

मनसुनको सुरुमै आएको बाढी, पहिरोका कारण मनाङमा ठूलो क्षति पुगेको छ । मनाङको चामे, ताल गाउँ मर्स्याङ्दीमा बाढी आएका कारण डुबानमा परेका थिए । बाढीका कारण मनाङमा १ हजार बढी परिवार विस्थापित भएका छन् । बाढीका कारण मनाङमा सडक, सञ्चार, खानेपानी, विद्युतविहीन बन्न पुगेको छ ।