गृहमन्त्री, गृहसचिवसहित तीन वटै सुरक्षा निकायका प्रमुख शीतलनिवासमा

४ असार, काठमाडौं । राष्ट्रपति विद्यादेवी भण्डारीले गृहमन्त्री, गृहसचिवसहित तीन वटै सुरक्षा निकायका प्रमुखलाई शीतलनिवासमा बोलाएर छलफल गरेकी छिन् । शुक्रबार अपरान्ह गृहमन्त्रीसहित सुरक्षा निकायका प्रमुखसँग प्राकृतिक विपत्ति, राहत उद्धारको विषयमा छलफल गरेकी हुन् ।

नेपाल प्रहरी, सशस्त्र प्रहरी र राष्ट्रिय अनुसन्धान विभागका प्रमुखहरु पौने चार बजे राष्ट्रपति कार्यालय पुगेर फर्केका छन् । गृहमन्त्री खगराज अधिकारी, गृहसचिव महेश्वर न्यौपाने, नेपाल प्रहरी महानिरीक्षक शैलेश थापा, सशस्त्र प्रहरी महानिरीक्षक शैलेन्द्र खनाल र राष्ट्रिय अनुसन्धान विभागका प्रमुख गणेश अधिकारी शितल निवासमा गएका हुन् ।

देशभर आएको बाढी पहिरोले ठूलो संख्यामा जनधनको क्षति गरेको र सुरक्षाकर्मीहरुले उद्धारका लागि निभाएको भूमिको विषयमा छलफल गरेकी थिइन । उनले सबै गृहमन्त्रालय अन्र्तगर रहेका सुरक्षा अधिकारीहरुलाई चुस्तदुरुस्त खट्न र त्यसका लागि आवश्यक सेवा सुविधाको व्यवस्था गृहमन्त्री अधिकारीलाई आग्रह गरेकी थिइन ।

‘कोरोना संक्रमण र प्राकृतिक विपत्ति जस्तो संकट एकै साथ आइपरेकाले राहत र उद्धारमा खटिने सुरक्षाकर्मीहरुलाई सरकारले विशेष ध्यान दिनु पर्ने र त्यसका लागि मन्त्रालयले आवश्यक व्यवस्था गर्नुपर्ने आग्रह गर्नुभयो’, राष्ट्रपतिसँगको भेटका लागि पुगेका एक सुरक्षा प्रमुखले भने ।