इरानको नयाँ राष्ट्रपतिमा ६२ प्रतिशत मत ल्याएर इब्राहिम निर्वाचित

६ असार, एजेन्सी । इरानको नयाँ राष्ट्रपतिमा कट्टरपन्थी नेता इब्राहिम रईसी निर्वाचित भएका छन् । राष्ट्रपति पदका लागि भएको निर्वाचनमा उनी ६२ प्रतिशत मत ल्याएर विजयी भएका हुन् ।

बीबीसीका अनुसार रईसी हाल इरानका वरिष्ठ न्यायधीश हुन् र उनी अत्यन्तै रुढीवादीरकट्टर विचारधाराका मानिन्छन् । रईसीमाथि अमेरिकाले प्रतिबन्ध लगाएको छ । उनी राजनीतिक बन्दीलाई फाँसीको सजाय दिने निर्णय गर्ने न्यायाधीशमा पर्छन् ।

साठी वर्षीय धर्मगुरु रइसीले आफ्नो व्यावसायिक जीवनको अधिकांश समय अभियोजनकर्ताको भूमिका निर्वाह गर्दै बिताएका छन् । सन् २०१७ मा हसन रुहानीसँग राष्ट्रपति पदमा हार बेहोरेपछि उनले सन् २०१९ मा न्यायालय प्रमुखको रुपमा नियुक्ति पाएका थिए ।

उनी आफूलाई भ्रष्टाचार विरुद्धको अभियन्ता र इरानको आर्थिक समस्या समाधान गर्ने नेतृत्वकर्ताको रुपमा चिनाउँछन् । इरानमा सर्बोच्च नेतापछि राष्ट्रपति दोस्रो वरीयतामा पर्छ । राज्यसम्बन्धी सम्पूर्ण मामिलामा अन्तिम निर्णय सर्वोच्च नेता आयातोल्लाह अलि खामेनेईको हुने गर्छ भने राष्ट्रपतिको आन्तरिक र वैदेशिक मामिलामा महत्त्वपूर्ण प्रभाव हुन्छ।