भोलिबाट पत्रकार महासंघले अनुगमन गर्ने

६ असार, काठमाडौं । कोरोना महामारीका बेला विभिन्न सञ्चारगृहले श्रमजीवी पत्रकारहरुलाई रोजगारीको अवसरबाट बञ्चित गरेको गुनासो बढेको भन्दै नेपाल पत्रकार महासंघले भोलिबाट अनुगनम गर्ने भएको छ ।

महासंघका महासचिव रोशन पुरीले आज जारी गरेको विज्ञप्तिमा यस्तो जानकारी दिइएको हो । केही सञ्चारगृहले श्रमजीवी पत्रकारलाई कामबाट हटाएको र पारिश्रमिक नदिएको गुनोसो बढेको पनि विज्ञप्तिमा उल्लेख गरिएको छ ।

कोरोना महामारीका बेला सञ्चारगृहका मालिकहरुले श्रमजीवी पत्रकार र कर्मचारीको शोषण गर्ने प्रवृत्ति त्याग्नुपर्ने भन्दै कामबाट हटाउने, पारिश्रमिक नदिने, फोर्स लिभ लिन लगाउने वा तलब घटाउने जस्ता काम नगर्नसमेत महासंघले चेतावनी दिएको छ ।

यस्ता धेरै गुनासा आएकाले महासंघले भोलिबाटै सञ्चारगृहकै अनुगनम गर्ने भएको छ– विज्ञप्तिमा उल्लेख छ ।