अनलाइन भिडियो कन्फ्रेन्समार्फत माओवादी केन्द्रको आकस्मिक बैठक जारी

७ असार, काठमाडौं । नेकपा माओवादी केन्द्रले केन्द्रीय समितिको आकस्मिक बैठक आज बसिरहेको छ । अनलाइन भिडियो कन्फ्रेन्समार्फत बसिरहेको आकस्मिक बैठकमा समसामयिक विषयमा छलफल भैइरहेको छ ।

स्रोतका अनुसार अनलाइन भिडियो कन्फ्रेन्सको आकस्मिक बैठक अध्यक्ष पुष्पकमल दाहाल ‘प्रचण्ड’ले बोलाएका हुन् । जारी बैठकमा अध्यक्ष केहीबेरमा प्रचण्डले वर्तमान समसामयिक राजनीतिक परिस्थितिबारे ब्रिफिङ गर्ने कार्यक्रम छ ।

जारी केन्द्रीय समिति बैठकमा प्रचण्डले पार्टी सुदृढीकरणका लागि केन्द्रीय सदस्यहरूसँग सुझाव लिइरहेका छन्। सबैको सुझाव समेटेर प्रचण्डले नयाँ प्रतिवेदन तयार गर्ने भएका छन् ।

स्रोतका अनुसार माओवादी केन्द्रले ९९ केन्द्रीय सदस्य थप्ने भएको छ । दलित, महिला तथा युवालाई प्राथमिकतामा राखेर ९९ केन्द्रीय सदस्य थप्ने तयारी भइरहेको छ ।

पार्टीको प्रस्तावित नयाँ विधानमा केन्द्रीय समिति २९९ सदस्यीय बनाउने उल्लेख छ । सो विधान केन्द्रीय समितिको बैठकबाट पारित भएपछि लागू हुनेछ ।

केन्द्रीय सदस्य थपिँदा महिलालाई ३५ प्रतिशत र दलितलाई १५ प्रतिशत कोटा छुट्याइएको छ । नेता यादवकाअनुसार कार्यदलले २० प्रतिशत युवालाई पनि केन्द्रीय समितिमा स्थान दिन सुझाव दिएको छ ।