अपि पावर कम्पनीको हकप्रद शेयरमा असार ९ गतेसम्म आवेदन दिन सकिने

७ असार, काठमाडौं । अपि पावर कम्पनीको हकप्रद शेयरमा आवेदन गर्ने अन्तिम दिन असार ९ गते (बुधवार) रहेको छ ।

कम्पनीले जेठ २० गतेदेखि २९ दशमलव ३८ प्रतिशत हकप्रद शेयरको विक्री खुला गरेको हो । कम्पनीले  १०० अंकित दरको ५६ लाख ७० हजार कित्ता हकप्रद शेयर निष्कासन गरिरहेको छ । विक्री प्रबन्धक मुक्तिनाथ क्यापिटल लिमिटेड रहेको छ । साथै, आवेदकले मेरो शेयरबाट पनि आवेदन दिन सकिने व्यवस्था रहेको छ ।

साथै, यस हकप्रदमा अपि पावर कम्पनी ट्रेड टावर थापाथली तथा मुत्तिनाथ विकास बैकको शाखा कार्यालयहरु इटहरी, पोखरा, नागढुङ्गा, नारायणगढ, सुर्खेत, नेपालगञ्ज, धनगढीर जनकपुरबाट आवेदन दिन सक्ने कम्पनीले जानकारी गराएको छ ।

कम्पनीले निष्कासन गर्न लागेको हकप्रद शेयरलाई केयर रेटिङ नेपालले केयर एनपी बी प्लस रेटिङ प्रदान गरेको छ । उक्त रेटिङले कम्पनीको वित्तीय दायित्व बहन गर्ने क्षमतामा जोखिम रहेको संकेत गर्दछ ।

यस अघि कम्पनीले ४७ प्रतिशत हकप्रद शेयर निष्कासन गरिसकेको थियो । हाल कम्पनीको चुक्तापूँजी १ अर्ब ९२ करोड ९७ लाख ५६ हजार रहेको छ । यही पूँजीको आधारमा २९ दशमलव ३८ प्रतिशत हकप्रद शेयर निष्कासन गरेको हो । यो हकप्रद शेयर निष्कासन पछि कम्पनीको पूँजी  २ अर्ब ४९ करोड ६७ लाख ५६ हजार पुग्नेछ ।