आज देशका धेरै ठाउँमा मौसम सफा, दिउँसोपख सामान्य बदली हुने

८ असार, काठमाडौं । जल तथा मौसम पूर्वानुमान महाशाखाले आज देशका धेरै ठाउँमा मौसम सफा रहेको जनाएको छ । काठमाडौं उपत्यकासहित धेरै ठाउँमा मौसम सफा रहेको जल तथा मौसम पूर्वानुमान महाशाखाले जनाएको छ ।

दिउँसोपख मौसम सामान्य बदली हुनेछ । मनसुनी वायुको प्रभाव रहेकाले धेरैजसो ठाउँमा फाट्टफुट्ट पानी पर्न सक्नेछ । वाग्मती प्रदेशमा काठमाण्डौ उपत्यकासहित एक र दुई ठाउँ र प्रदेश दुई, लुम्बिनी र गण्डकी प्रदेशका थोरै ठाउँमा पानी पर्ने महाशाखाले जनाएको छ ।

वाग्मती, गण्डकी र लुम्बिनी प्रदेशका एक दुई ठाउँमा मेघगर्जन र चट्याङ्गसहित भारी वर्षाको समेत सम्भावना रहेको छ । पानी पर्ने क्षेत्रका पहाडी भू-भागमा पहिरो तथा गेग्रान बहावको जोखिम र नदीनाला तथा खहरे खोलामा पानीको सतह बढ्न सक्ने भएकोले आवश्यक सतर्कता अपनाउन महाशाखाले आग्रह गरेको छ ।

त्यस्तै आज राति पनि देशभरको मौसम सामान्य बदलीकै अवस्था रहने अनुमान छ । देशभर मनसुनी वायुको प्रभाव रहेको र देशको दक्षिणी भू-भाग नजिक मनसुनी न्युन चापीय रेखा रहेकाले देशभर नै बदली रहने महाशाखाले जनाएको छ ।