धनुषाका एसपी रानाभाटमाथि छानविन शुरु, लागुऔषध मुद्धा कमजोर बनाएको आरोप

८ असार, काठमाडौं । प्रहरी प्रधान कार्यालयले धनुषाका प्रहरी प्रमुख प्रहरी उपरीक्षक (एसपी) प्रकाश रानाभाटमाथि लागूऔषधको मुद्दालाई कमजोर बनाउन खोजेको आरोपमा छानविन शुरु गरेको छ ।

महानिरीक्षकको सचिवालयमा लागुऔषधका मुद्धा कमजोर बनाएको र सीमा सुरक्षा चौकीहरुलाई खुकुलो बनाएको आरोप लागेपछि छानविन शुरु भएकाे हो । धनुषामा गत फागुनमा तीन जना व्यक्ति लागुऔषधको कारोवारमा पक्राउ परेका र ती व्यक्तिहरुको मुद्धालाई कमजोर बनाएर छाडेको आरोप उनीमाथि लागेकाे छ ।

प्रहरी प्रधान कार्यालयमा परेको उजुरी अनुसार गत फागुनमा धनुषा प्रहरीले तीन सय ८० थान नाइट्रोजन औषधिजन्य लागुऔषध बरामद गरी तीन जना युवाहरुलाई पक्राउ गरेको थियो । धनुषाको बटेश्वर गाउँपालिकाबाट लागूऔषधसहित तीन जना २१ वर्षीय केशव सिंह, २० वर्षीय रोशन ठाकुर र सहिल सिंह पक्राउ परेका थिए ।

उनीहरु चढेको ज ७ प १५७४ नम्बरको मोटकसाइकल पनि प्रहरीले नियन्त्रणमा लिएको थियो । सो मुद्दामा आर्थिक लाभ लिएर मिसिल परिवर्तन गरी मुद्दा कमजोर बनाएको आरोप एसपी रानाभाटमाथि आरोप लागेको छ । प्रहरी प्रधान कार्यालयका एसएसपी कृष्ण महतले छानविन गरिरहेका छन् । तर रानाभाटको छानविनबारे प्रहरी प्रधान कार्यालयमा कोही पनि बोल्न चाहदैनन् ।

धनुषा जिल्ला आफैमा विवादित जिल्ला भएकाले त्यहाँ नेपाल–भारत क्षेत्रबाट निर्वाधरुपमा तस्करी समेत हुने गरेका छन् । नेपालबाट भारत तर्फ रक्सी, मटर, मरिच, सेव लगायतका सामग्रीहरु ठुलो परिमाणमा तस्करी गराइन्छ भने भारत तर्फबाट खानेतेल, चिनी, मलखाद्य, रजनीगंधा, दुधको पाउडरको पोका लगायतका किराना सामग्री नेपालतर्फ ल्याउने गरिन्छ ।

विशेषगरी ग्रामीण क्षेत्रहरुमा तस्करले ओसारपोसार गर्ने सरसामान छ्याप्छ्याप्ती बिक्री भइरहेका छन् । लकडाउनमा जिल्लाको पूर्वी क्षेत्र दुहवी, इनरुवा, महिनाथपुर, खजुरी, महुवा, मुखियापट्टी मुसहरनीया लगायतका सीमानाकाहरुबाट अत्याधिक मात्रामा तस्करी हुने गरेको स्रोतको दावी छ । यसमा पनि नेपाल प्रहरीको टोली मौन रहेको एसपी रानाभाटमाथि परेको उजुरीमा उल्लेख छ । धनुषामा कपडा, हार्डवेयरका सामान, मटर, मरिच, मोबाइलका पाटपुर्जा र किरानाका सामानहरु तस्करी भैरहेका छन् ।

तस्करीमा नेपाल प्रहरी र सशस्त्र प्रहरी दुवैले सहयोग गरिरहको स्रोतको दावी छ । कुरा नमिल्दा मात्रै तस्करीमा सामानहरु बरामद हुने गरेको स्थानीयहरुले आरोप समेत लगाएका छन् । सीमामा सशस्त्र प्रहरीले छाड्ने र सीमा कटाएपछि नेपाल प्रहरीले संरक्षण गर्ने गरेको स्रोतले जनाएको छ ।

जनकपुर भन्सार कार्यालय स्रोतका अनुसार रजनीगन्ध र गुट्खा आयतमा भन्सार तिरेको रकम निकै कम छ तर जनकपुरका हरेक पसलमा रजनीगन्धा गुट्खा भारी परिणाममा उपलब्ध छ । भन्सार छलेर ल्याइएका गुट्खा, रजनीगन्धा काठमाडौदेखि विदेश समेत तस्करी हुने गरेको छ । सीमा नाकाबाट भन्सार छलि गरेर आएका यस्ता वस्तुलाई नेपाल प्रहरीले बजार क्षेत्रमा संरक्षण गरेको पनि स्थानीयहरुले आरोप लगाएका छन् ।