ट्राफिक प्रहरीले धराप थापेर मुख्य सडक नै छेक्दा जाम

८ असार, काठमाडौं । आजदेखि काठमाडौं उपत्यकामा निषेधाज्ञा खुकुलो भएसँगै यतिबेला सडकमा सवारीसाधनको चाप बढेको छ । करिब ५४ दिन लामो निषेधाज्ञा खुकुलो भएसँगै आजबाट निजी सवारी साधन सञ्चालनमा आएका छन् । तर, चेकिङका नाममा ट्राफिक प्रहरीले धराप थापेर मुख्य सडक नै छेक्दा जाम बढेको हो ।

उपत्यकाका तीन जिल्ला प्रशासनको निर्णयअनुसार आजबाट पसल, ट्याक्सी र निजी सवारी ‘जोर-बिजोर’ चलाउन पाइएपछि काठमाडौं उपत्यकामा मंगलबार चहलपहल बढेको बताइएको छ । उपत्यकाका तीन प्रमुख जिल्ला अधिकारीहरूको आइतबार बसेको संयुक्त बैठकले आजदेखि एक साता निषेधाज्ञा थप गर्ने निर्णय गरेका थिए।

जोर गते जोर नम्बर र बिजोर गते विजोर नम्बर ‘नम्बर प्लेटको अन्तिम अक्षर’का सवारी चल्नेछन् । ट्याक्सीलाई पनि जोरबिजारमा सञ्चालन गर्न दिइएको छ । तर सार्वजनिक सवारी साधन भने अझै सञ्चालमा आएको छैन ।

अहिले सन्चालनमा आएका गाडीहरुलाई पनि प्रहरीले बिभिन्न स्थानमा चेकिङ गर्दै आएको छ । चेकिङ पोष्ट नजिक रोकिनुपर्दा केहीबेर सवारीसाधनहरुको जाम हुने गरेको छ ।

ट्राफिकले मुख्य मुख्य सडकमै धराप ‘ब्यारिकेड्स’ राखेर चेकजाँच गर्दा सर्वसाधारणलाई भने सास्ती खेप्नु परेको छ । आवागमन सहज गरिदिनुको सट्टा प्रहरीले मुख्य सडक नै अवरूद्ध पार्दा मंगलबार राजधानीका सडकहरू अस्तव्यस्त देखिएका छन् । प्रदर्शनी मार्ग, रामशाहपथ, कोटेश्वर, जावलाखेल चोकजस्ता भीडभाड हुने क्षेत्रमा ट्राफिक प्रहरीले बाटो छेकेको छ।