चर्चित दुई मुद्धामा आज दुबै पक्षबाट बहस पैरवी हुने

८ असार, काठमाडौं । नेपाली राजनीतिको केन्द्रका रुपमा रहेको नेकपा एमाले सम्बद्ध दुई मुद्धाको सुनुवाई आज सर्वाेच्च अदालतमा भइरहेको छ । जेठ ७ गते मध्यरातमा गरिएको प्रतिनिधिसभा विघटनपछि काम चलाउ हैसियतमा रहेको प्रधानमन्त्री केपी ओली नेतृत्वको सरकारले मन्त्रिपरिषदमा गरेको पुनर्गठन गैरसंवैधानिक भएको भन्दै सर्वाेच्चमा परेको रिटको सुनुवाई प्रधानन्यायधीश चोलेन्द्र शम्शेर राणा र न्यायधीश प्रकाशकुमार ढुंगानाको इजलाशमा हुँदैछ ।

वरिष्ठ अधिवक्ता दिनेश त्रिपाठीले ओलीको हैसितय कामचलाउ भइसकेको तर कार्यकारी प्रधानमन्त्रीको हैसियतमा पुनर्गठन गरेको भन्दै बदर गर्न माग गरेका छन् । यसअघि जेठ २५ गते न्यायधीश इश्वरप्रसाद खतिवडाको एकल इजलाशले यो रिटमाथि सुनुवाई गर्दै आज दुबै पक्षलाई बोलाएको थियो । आज यसमा दुबै पक्षबाट बहस पैरवी हुनेछ ।

यस्तै एमाले अध्यक्ष समेत रहेका प्रधानमन्त्री ओली पक्षले फागुन २८ गते केन्द्रीय कमिटीलाई दसौं महाधिवेशनमा रुपान्तरण गरेको निर्णय खारेज गरी कर्णाली प्रदेशका चार जना सांसद्माथि गरेको कारबाही तत्काल नगर्नु भन्ने सर्वाेच्चको अन्तरिम आदेशमाथि भ्याकेट हालेकोमा आजै सुनुवाई भइरहेको छ ।

न्यायधीशद्वय डा. आनन्दमोहन भट्टराई र हरि फुुयाँल रहेको संयुुक्त इजलाशले यसमा सुनुवाई गर्ने भएको छ । प्रधानमन्त्री ओलीले पार्टी एकताको प्रयास गरिरहेका बेला भ्याकेट हालेर अर्काे पक्षलाई चिढाएका छन् । त्यसैले यी दुबै रिटमाथि हुने आदेशले मुलुकको राजनीतिको दिशा नै बदलिन सक्ने अवस्था रहेको छ ।