ओलीका कारण मुलुक गम्भीर संकटतर्फ: विपक्षी गठबन्धन

८ असार, काठमाडौं । विपक्षी गठबन्धनले प्रधानमन्त्री केपी ओलीका कारण देश गम्भीर संटकतर्फ धकेलिएको टिप्पणी गरेको छ । विपक्षी गठबन्धनका नेताहरुले ओलीका कारण मुलुक गम्भीर संकटतर्फ धकेलिएको भन्दै यसविरुद्ध संयुक्त रुपमा अघि बढ्ने बताएका हुन् ।

नेपाली कांग्रेसका सभापति शेरबहादुर देउवा, नेकपा ‘माओवादी केन्द्र’ का अध्यक्ष पुष्पकमल दाहाल, नेकपा ‘एमाले’ का वरिष्ठ नेता माधवकुमार नेपाल, जनता समाजवादी पार्टी ‘जसपा’ का अध्यक्ष उपेन्द्र यादव र राष्ट्रिय जनमोर्चाका उपाध्यक्ष दुर्गा पौडेलले संयुक्त वक्तव्य निकालेर प्रधानमन्त्री ओलीका क्रियाकलापले देश संकटतर्फ धकेलिएको विज्ञप्तिमा मार्फत उल्लेख गरेका छन् ।

प्रधानमन्त्री र सरकारले संकीर्ण स्वार्थका लागि जस्तोसुकै काम पनि गर्ने बाटो अपनाएको र यसले देशलाई गम्भीर संकटतर्फ धकेलेको विपक्षी गठबन्धनको ठहर छ । प्रधानमन्त्री ओलीका कारण नेपाली जनताको कष्टपूर्ण संघर्षबाट प्राप्त उपलब्धिहरू नै गुम्ने खतरा उत्पन्न भएको र देश नै गम्भीर संकटतर्फ धकेलिएको विज्ञप्तिमा उल्लेख छ । गठबन्धनले प्रधानमन्त्री ओलीले राज्य संयन्त्रलाई निष्पक्षरुपमा काम गर्न नदिएको आरोप पनि लगाएको छ ।

संयुक्त विज्ञप्तिमा स्वतन्त्र न्यायपालिकालाई धम्क्याउने र लोकतन्त्रको मूल आधार निर्वाचनको निष्पक्षता सुनिश्चित गर्ने दायित्व रहेको निर्वाचन आयोगलाई नियन्त्रण गर्ने षडयन्त्र भइरहेको तथा निर्वाचन आयोगले विभिन्न राजनीतिक दलसम्बन्धी विवादमा कानुनी व्यवस्था, स्थापित मान्यता र परम्पराको निरन्तर उल्लंघन गर्दै निर्धारित जिम्मेवारी अनुरुप निष्पक्ष रुपमा काम नगरी कानुन र न्यायसँग असंगत व्यवहार प्रदर्शन गर्नु चिन्ताको विषय भएको दाबी पनि गरिएको छ ।