सांग्रिला डेभलपमेण्ट बैंकको ऋणपत्रमा असार २० गतेसम्म आवेदन दिन सकिने

९ असार, काठमाडौं । सांग्रिला डेभलपमेण्ट बैंकको ऋणपत्रमा आवेदन दिने समयावधि थप भएको छ । कम्पनीले असार ६ गतेदेखि  ७५ करोड बराबरको ७ लाख ५० हजार कित्ता ऋणपत्र विक्री खुला गरेको हो ।

बैंकले प्रतिकित्ता १ हजार अंकित दरको कुल कित्ता ऋणपत्रमध्ये सामूहिक लगानीकोष सहित सर्वसाधारणका लागि ३ लाख कित्ता र ४ लाख ५० हजार कित्ता व्यक्तिगत तवरबाट विभिन्न संघ संस्थाहरुलाई विक्री गर्नेछ ।

उक्त ऋणपत्रमा आवेदन दिने छिटो अवधि असार ९ गते (आज) सम्म रहेपनि ऋणपत्रमा पूर्ण आवेदन नपरेपछि ढिलो अवधि असार २० गतेसम्म विक्री खुला रहने कम्पनीले जानकारी दिएको छ ।

१० वर्षे अवधि तथा वार्षिक ९ प्रतिशत ब्याजदर भएको सांग्रिला डेभलपमेण्ट बैंक डिबेञ्चर २०८७ नामको यो ऋणपत्र खरीदका लागि लागि न्यूनतम २५ कित्तादेखि अधिकतम ३ लाख कित्तासम्म आवेदन दिन सकिने व्यवस्था छ ।

कम्पनीको यो ऋणपत्रलाई इक्रा नेपाल लिमिटेडले समयमै वित्तीय दायित्व पूरा गर्ने तथा कर्जा जोखिम मध्यम रहेको इक्रा एनपी डबल वि प्लस रेटिङ प्रदान गरेको छ ।

यो ऋणपत्र विक्री गर्न कम्पनीले नेपाल धितोपत्र बोर्ड वैशाख ६ गते अनुमति पाएको हो ।

उक्त ऋणपत्र विक्री प्रबन्धकमा एनआईबिएल एस क्यापिटल रहेको छ । विक्री प्रबन्धकसँगै आस्बा सेवामा सहभागी सम्पूर्ण बैंक तथा वित्तीय संस्था र तीनका शाखा कार्यालयसँगै मेरोशेयर मार्फत पनि आवेदन दिन सकिने व्यवस्था छ ।