लघुवित्त र इन्स्योरेन्स कम्पनी आईपीओ निष्कासनको अनुमति माग्दै पुगे धितोपत्र बोर्ड, कुनले कति कित्ता निष्कासन गर्दै ?

९ असार, काठमाडौं । फेरि एक इन्स्योरेन्स कम्पनी र लघुवित्त कम्पनीले आईपीओ निष्कासन गर्ने भएका छन् ।

आइएमई लाइफ इन्स्योरेन्स र नेष्डो समृद्ध लघुवित्त वित्तीय संस्थाले आइपीओ निष्कासन गर्न लागेका छन् ।

आइएमई लाइफ इन्स्योरेन्स

आइएमई लाइफले ६० करोड रुपैयाँ बराबरको आइपीओ जारी गर्न नियामक नेपाल धितोपत्र बोर्डमा आवेदन दिएको छ । कम्पनीले प्रतिकित्ता १०० रुपैयाँ दरमा ६० लाख कित्ता आइपीओ जारी गर्न बोर्डसँग अनुमति मागेको हो । यसमा बिक्री प्रबन्धकको काम सिभिल क्यापिटल मार्केटले गर्नेछ ।

यो आइपीओलाई केयर रेटिङ नेपालले केयर एनपी आईपीओ ग्रेड ४ प्रदान गरेको छ । यसले कम्पनीको वित्तीय अवस्था औषत भन्दा कमजोर रहेको जनाउछ ।

हाल यस कम्पनीको चुक्ता पुँजी १ अर्ब ४० करोड रुपैयाँ रहेको छ । कम्पनीले यही पुँजीबाट आइपीओ बिक्री गर्न लागेको हो । आइपीओ बिक्रीपछि यसको चुक्ता पुँजी २ अर्ब रुपैयाँ पुग्नेछ ।

नेष्डो समृद्ध लघुवित्त

नेष्डो समृद्ध लघुवित्तले पनि प्रतिकित्ता १०० रुपैयाँ दरले ८ लाख २८ हजार ७५० कित्ता आइपीओ बिक्री गर्न अनुमति मागेको छ । आइपीओ जारी गर्न ग्लोबललाई बिक्री प्रबन्धक नियुक्त गरेको छ ।

नेष्डो समृद्धको केन्द्रीय कार्यालय पर्वत जिल्लाको कुश्मा बजारमा रहेको छ । नेष्डोलाई नेपाल राष्ट्र बैंकले “घ” वर्गको राष्ट्रियस्तरको लघुवित्त वित्तीय संस्थाको रुपमा इजाजत दिएको छ । यसको अधिकृत पुँजी ५० करोड रुपैयाँ र जारी पुँजी २५ करोड ५० लाख रुपैयाँ रहेको छ ।

कम्पनीले जारी पुँजीको ३०% सेयर सर्वसाधारणलाई बिक्री गर्न लागेको हो ।