किसानलाई आकर्षित गर्न उन्नत जातका भैँसी वितरण

९ असार, जाजरकोट । भेरी नगरपालिकाले व्यवसायिक पशुपालनमा किसानलाई आकर्षित गर्न उन्नत जातका भैँसी वितरण गरेको छ । दूध पकेट क्षेत्र विस्तार र किसानको आय बढाउन अनुदानमा उन्नत जातका भैँसी वितरण गरिएको हो ।

वडा नं १३ रोकायगाउँमा ५० प्रतिशतभन्दा माथि क्रस वर्णशङ्कर (मुर्रा) जातको ब्याउने भैँसी वितरण गरिएको नगरप्रमुख चन्द्रप्रकाश घर्तीले जानकारी दिए। दूध पकेट क्षेत्र बनाउने गरी भैँसीपालन पकेट क्षेत्र निर्माण गर्न भैँसी वितरण गरिएको उनले बताए । नगरपालिकालाई दूधमा आत्मनिर्भर बनाउने लक्ष्यका साथ चार समूहमा रु ४८ लाखभन्दा बढीका क्रस मुर्रा जातका भैँसी वितरण गर्ने कार्यक्रम रहेको नगरप्रमुख घर्तीले जानकारी दिए।

मङ्गलबार १० किसानलाई क्रस मुर्रा जातको भैँसी वितरण गरिएको नगरपालिकाले यही असार २३ गतेसम्म बाँकी रहेका तीन भैँसीपालन कृषक समूहमा वितरण गरिसक्ने जनाएको छ । नगरपालिकाको ८० प्रतिशत अनुदानमा क्रस मुर्रा जातको भैँसी वितरण गरिएको हो ।