पौडेलले बोलाए भेला, बेग्लै रणनीति बनाउने तयारी

९ असार, काठमाडौं । नेपाली कांग्रेसले भदौ १६ देखि १९ गतेसम्म चौधौं महाधिवेशन गर्ने मिति तय गरेसँगै नेतृत्व हत्याउने होडबाजी सुरु भएको छ । संस्थापन पक्षबाट पार्टी सभापति शेरबहादुर देउवाले दोह¥याउने तयारी तीब्र पार्दैछन् भने उपसभापति विमलेन्द्र निधि पनि मैदानमा ओर्लने निश्चय गरेका छन् ।

देउवा र निधिले आफ्नो तयारी बढाइरहेका बेला संस्थापन इतर पक्षले पनि बेग्लै रणनीति बनाउने तयारी थालेका छ । यसैका लागि आज अपरान्ह् ३ बजे वरिष्ठ नेता रामचन्द्र पौडेलले निकट नेताहरुसँग छलफल गर्ने भएका छन् ।

पार्टी महामन्त्री डा. शशांक कोइरालाको महाराजगञ्जस्थित निवासमा यो पक्षको भेला हुुँदैछ । उक्त भेलामा आफ्नो समूहबाट एकजना सर्वसम्मत उमेदवार बनाइनुपर्नेमा नेताहरुले जोड दिने भएका छन् ।

आजको भेलामा पौडेलले पूर्व महामन्त्री कृष्णप्रसाद सिटौलालाई समेत बोलाएका छन् । तर सिटौला आउने नआउने चाहिं टुंगो नलागेको स्रोतको भनाई छ । सिटौला पक्षीय युवा नेताहरु गगन थापा र प्रदीप पौडेल भने भेलामा सहभागी हुने बुझिएको छ ।