खाल्डोमा जमेको पानीले दाजु भाइको ज्यान लियाे

९ असार, जनकपुरधाम । सर्लाहीमा पानी जमेको खाल्डोमा डुबेर दाजु भाइको ज्यान गएको छ । जिल्लामा रहेको ईंटा उद्योगले खनेको खाल्डोमा जमेको पानीमा डुबेर बुधबार दाजु भाइको मृत्यु भएको प्हरीले जनाएको हो ।

सदरमुकाम मलंगवा नगरपालिका ११ गम्हरिया निवासी सद्दाम अन्सारीका ८ वर्षीय छोरा रेआज र ६ वर्षीय छोरा नेआज अन्सारीको पानी जमेको खाल्डोमो डुबेर मृत्यु भएको प्रहरीले जनाएको छ ।

दुवै दाजुभाइ बाख्रा चराउन गएको बेला ईंटा उद्योगले खनेको खाडलमा जमेको पानीमा पौडी खेल्न जाँदा डुबेको सर्लाही प्रहरीले जनाएको छ । पौडी खेल्ने क्रममा डुबेका दाजुभाइलाई तत्कालै ईंटा उद्योगका मजदुर र गाउँलेले पानीबाट निकाली उपचारका लागि मलंगवा अस्पतालमा पुर्‍याएको थियो । प्रहरीका अनुसार अस्पताल पुर्‍याउनेवित्तिकै उनीहरुको मृत्यु भएको बताइएको छ ।