भारतमा चलचित्र भवनहरु बन्द हुँदा ओटीटी बजार विस्तार

भारतमा चलचित्र भवनहरु बन्द हुँदा ओटीटी बजार विस्तार भएका छन् । यसैबीच, भारतमा ओटीटी प्लेटफर्मको नयाँ खेल सुरु भएको छ । यो खेलमा बलिउडका चर्चित नायक–नायिकाहरुलाई आकर्षित गर्नका लागि ओटीटी संचालकहरुले महंगो रकम खर्च गरिरहेका हुन् ।

पहिलो चरणको लकडाउनपछि भारतमा चलचित्र भवनहरु बन्द हुँदा ओटीटी बजार विस्तार भएको छ । योसँगै भारतका धेरै दर्शकहरु ओटीटीमा जोडिएका पनि छन् ।बलिउड चलचित्रका नायकहरुलाई महंगो पारिश्रमिकमा गरिएको अफरले यो कुराको पुष्टी गर्दछ कि, ओटीटीका संचालकहरु आफ्नो बजार अब दर्शकको ठूलो संख्यामाझ विस्तार गर्न चाहन्छन् ।

नायक अजय देवगणले एक वेव सिरिजका लागि १२५ करोड रुपैयाँ पारिश्रमिक लिएको खबर सार्वजनिक भैसकेको छ । यस भन्दा अगाडि नायक अक्षय कुमारलाई पनि ९० करोड पारिश्रमिकको अफर गरिएको थियो ।

यस्तै, कलाकार मनोज बाजपेयीलाई पनि वेव सिरिजका लागि २० देखि २२ करोडको अफर आइसकेको छ । ओटीटी संचालकहरुले ओटीटीमा उत्कृष्ट काम गरेका कलाकारसँग बलिउड कलाकारको पनि आवश्यकता महशुश गर्न थालेका छन् ।

कतिपय विश्लेषकहरु अब ओटीटीमा पनि बलिउडमा जस्तै स्टारको क्रेज सुरु हुने विश्लेषण गरिरहेका छन् भने अर्कोतिर ओटीटी बलिउड भन्दा फरक रहेको तर्क पनि हुने गरेको छ ।