आज विपक्षी गठबन्धन विद्यार्थी संगठनले ओलीविरुद्ध प्रदर्शन गर्दै

१० असार, काठमाडौं । विपक्षी गठबन्धन आवद्ध पाँच राजनीतिक दलका विद्यार्थी संगठनले आज प्रधानमन्त्री केपी ओलीविरुद्ध प्रदर्शन गर्दैछन्। उनीहरुले प्रधानमन्त्रीले चालेका असंवैधानिक कदम र पछिल्ला गतिविधिविरुद्ध प्रदर्शन गर्न लागेका हुन् ।

नेविसंघ, अनेरास्ववियू, अनेरास्ववियू क्रान्तिकारी, समाजवादी विद्यार्थी युनियन र अखिल छैटौंमा आबद्ध विद्यार्थीहरुले दिउँसो ३ बजे काठमाडौंको प्रदर्शनीमार्गमा प्रदर्शन गरिने बताइएको छ । आज देशैभर विद्यार्थी संगठनले सरकारको असंवैधानिक कदमविरुद्ध प्रदर्शन गर्ने कार्यक्रमको तालिका छ ।

नेपाली कांग्रेसका सभापति शेरबहादुर देउवाको निवास बुढानिलकण्ठमा बुधबार बसेको विपक्षी गठबन्धनको बैठकले पनि प्रधानमन्त्री केपीशर्मा ओलीविरुद्ध सडक संघर्ष गर्ने निर्णय गरेको थियो। कोरोना महामारीको बढ्दो प्रकोपकाबीच स्वास्थ्य मापदण्ड अपनाएर भौतिक दूरी कायम गर्दै सडक प्रदर्शन गर्ने उनीहरुले निर्णय गरेका थिए।