ठाकुर र महतो पक्षका नेताहरूको बैठक आज बस्दै

१० असार, काठमाडौं । जनता समाजवादी पार्टीका अध्यक्ष महन्थ ठाकुर तथा नेता राजेन्द्र महतो पक्षका नेताहरूको बैठक आज बस्दै छ । आज दिउँसो १ बजे बबरमहलमा उनीहरू समसामयिक राजनीतिक घटनाक्रमबारे केन्द्रित रहेर छलफलमा जुटेका हुन् ।

जसपाको ठाकुर पक्ष नेता राजेन्द्र महतोसहित प्रधानमन्त्री केपी ओली नेतृत्वको सरकारमा गएको थियो। महतो उपप्रधान तथा सहरी विकास मन्त्री भएका थिए। जसपाबाट दुई राज्यमन्त्री र ९ जना मन्त्री भएका थिए।

तर सर्वोच्चले अन्तरिम आदेश दिएसँगै १९ दिनमै मन्त्रीहरू पदमुक्त भएका थिए। मंगलबार पदमुक्त भएका मन्त्रीहरू र नेताहरू अब कसरी अगाडि बढ्ने भन्नेबारे छलफलमा जुट्न लागेका छन्। बैठकमा आज समसामयिक राजनीतिक घटनाक्रमबारे छलफल हुने जसपाका एक नेताले बताए ।