पकाहा मैनपुर गाउँपालिकामा विकासको नाममा व्यापक अनियमितता

१० असार, बीरगञ्ज । स्थानीय निकायमा विकाश निर्माणको नाममा चरम भ्रष्टचार हुने गरेको छ । जनप्रतिनिधि, कर्मचारी, उपभोक्ता समिति र ठेकेदारहरुको आपसी मिलोमतोमा विकाश निर्माणको काममा चरम अनियमिता भईरहेको हो ।

पर्साको पकाहा मैनपुर गाउँपालिकाका अध्यक्ष विजयकुमार चौरसियासहितका जनप्रतिनिधि साथै कर्मचारीहरुले कानुनको धज्जी उडाउँदै विकाश निर्माणको रकममा चरम भ्रष्टचार गर्दै आएका छन् ।

गाउँपालिकाको कार्यालय अगाडि बाउण्ड्री वाल निर्माणमा कमसल सामग्री प्रयोग गरी निर्माण कार्य भईरहेको स्थानीयले सरोकारवालाहरुले आरोप लगाएका छन । गाउँपालिकाले दिएको ८ लाखको लागतमा निर्माण हुन लागेको बाउण्ड्री वाल निर्माण पुरा नहुँदै भत्किन लागेको छ । दिनमा वाल जोडेर गएपनि रातिको बेला आफै वाल भत्किन लाग्दा स्थानीयहरु आक्रोशित बनेका छन ।

त्यस्तै गाउँपालिकाको वडा नं २ मा मानिकपुरदेखि भेलाहासम्म जाने बाटोमा गाउँपालिकाले दिएको ५ लाखको लागतमा उक्त बाटोमा ग्रेवलको नाममा मात्र बालुवा छरिएको छ । ग्रेवल छर्ने ठाउँमा मात्र बालुवा छरिएको देखेपछि स्थानीयले काम समेत रोकेका छन । ठेकेदार , कर्मचारी र जनप्रतिनिधिहरुको मिलोमतोमा कमसल कार्य भईरहेको छ । गाउँपालिकाबाट कार्य आदेश , स्टीमेटसमेत नलिई काम भईरहेको हो ।

कमिशन दिएर कार्य गर्न, काम गरिसकेपछि कार्य आदेश , स्टीमेटसहित अरु आवश्यक कागजात एकै दिनमा तयार गरि चेक दिने जस्तो काम भईरहेको स्थानीयले आरोप लगाएका छन । जनप्रतिनिधिहरुले विकाशको नाममा गरेको भ्रष्ट्राचारप्रति स्थानीय बासिन्दा समेत आक्रोशित भएका छन् । जनप्रतिनिधि र कर्मचारीले मनपरी लुट मच्चाउँदा पनि कारवाही नहुँदा स्थानीयले सम्बधित निकायप्रति आक्रोश व्यक्त गरेका छन् ।

गाउँपालिकामा एक त विकास निर्माणको काम नै नगरेको, गरे पनि गुणस्तरहिन काम गरेको स्थानीयबासीले आरोप लगाएका छन । यस विषयमा सो गाउँपालिकाका अधिकृत रामेश सुवेदीसँग बुझदा निर्माण अवस्थामा पानी परेकोले बाउण्ड्री वाल भत्किन लागेको दावी गरे ।

निर्माण अवस्थामा यस्तो कार्य हुन्छ । यसमा आतिनु पर्दैन । हामीले वाल भत्किन लागेको कामको पेमेन्ट गर्दैनौ । बाउण्ड्री वालको काम पूरा भएपछि नै हामी मूल्यांकन गरेर पेमेन्ट गर्छौ । म आउनु भन्दा अगाडि गाउँपालिकाबाट कार्यआदेश बिना नै काम भइरहेको थियो । म आएपछि पुरै काम रोकी कार्यआदेश लिई, काम हुने ठाउँमा होडिंग बोर्ड लगाई र स्टीमेट अनुसार मात्र काम गर्न भनेको छु । यदि कसैले बिना कार्य आदेश लिई कार्य गर्दैछ भने उसको पेमेन्ट हामी गर्दैनौ , गाउँपालिका अधिकृत सुवेदीले बताए।