विपक्षी गठबन्धनले सम्पादकसँग अन्तक्रिया गर्ने

१० असार, काठमाडौं । प्रधानमन्त्री केपी ओलीले सत्ता नछाड्ने नीतिलाई मात्र केन्द्रमा राखेर चल्ने संकेत गरेपछि विपक्षी गठबन्धनले त्यसको प्रतिकारमा कानूनी र राजनीतिक लडाईं एकैपटक सुरु गर्ने भएका छन् ।

हिजो साँझ नेपाली कांग्रेस सभापति शेरबहादुर देउवा निवासमा बसेको पाँच दलीय गठबन्धन बैठकमा नेताहरुले विस्तारै सडक आन्दोलनलाई समेत अंगाल्ने निर्णय गरेको छ ।

त्यसका लागि ओलीविरुद्ध समाजका सबै वर्ग र तप्कालाई जागरुक गराउने नीति पनि गठबन्धनले तय गरेको छ । सोही अनुरुप आज दिउँसो गठबन्धनले वरिष्ठ पत्रकार र सम्पादकहरुसँग अन्तक्र्रिया गर्ने भएका छन् ।

दिउँसो २ बजे सिंहदरबारस्थित संसद भवनमा गठबन्धनले सम्पादकहरुसँग अन्तक्रिया गर्न लागेको सभापति देउवाका स्वकीय सचिव भानु देउवाले बताएका छन् । हिजोको बैठकले नागरिक समाजसँग समेत यस्तो छलफल र अन्तक्रिया गर्ने निर्णय गरेको थियो ।

ओलीको सर्वसत्तावाद विरुद्ध सडक संघर्ष नै गर्नुपर्ने वाध्यता आइलागेको बुझाई गठबन्धनको देखिएको छ । सत्ताका लागि जोसँग र जस्तोसुकै सम्झौता गर्न अग्रसर भएका ओलीलाई रोक्न अब नागरिक समाज नै सडकमा आउनुपर्ने उनीहरुको बुझाई छ ।