प्रतिनिधिसभाको कार्यकाल पाँच वर्ष हुनेमा वरिष्ठ अधिवक्ता दाहालकाे जोड

१० असार, काठमाडौं । वरिष्ठ अधिवक्ता हरिहर दाहालले संविधानले प्रतिनिधिसभाको कार्यकाल पाँच वर्ष हुनेमा जोड दिएको बताएका छन् । सर्वाेच्च अदालतको संवैधानिक इजलाशमा आज वहस गर्दै दाहालले भने – संविधानले अन्तिम अवस्थासम्म प्रतिनिधिसभा रहोस् भन्ने उद्येश्यले धारा ७६(५)को व्यवस्था गरेको हो ।

तर राष्ट्रपति र प्रधानमन्त्रीले उक्त व्यवस्थालाई निर्दलीयताको भूत जगाएको भनेर प्रतिनिधिसभाको हैसियतबारे खिसीट्यूरी गरेको भन्दै वरिष्ठ अधिवक्ता दाहालले आक्रोश पोखेका छन् ।

सोही धारा बमोजिम माननीय शेरबहादुर देउवाले १४९ जनाको वहुमत हस्ताक्षरसहित दाबा गर्दा राष्ट्रपतिले दलीय आधार खोज्नुको के नियत हो ? भन्दै जसरी भएपनि एउटै व्यक्ति प्रधानमन्त्री बन्नुपर्छ भन्ने आग्रहले काम गरेको उनले बताए ।

सार्वभौम संस्था प्रतिनिधिसभा जोगाउन गरिएको व्यवस्थालाई मजाक बनाउने अधिकार राष्ट्रपतिलाई कसले दियो ? उनले प्रश्न गरे ।