कृष्णगोपाल मन्त्री बन्न अयोग्यः विवेकशील साझा

१० असार, काठमाडौं । मन्त्री जस्तो गरिमामय पदमा रहेका व्यक्ति नै समाजमा कुरीति र भेदभाव बढाउन अग्रसर भएको भन्दै विवेकशील साझा पार्टीले कडा विरोध जनाएको छ । शिक्षामन्त्री कृष्णगोपाल श्रेष्ठले दलित भएकै कारण कोठा भाडा नदिएको आरोपमा पक्राउ परेकी एक महिलालाई शक्तिको आडमा मुक्त गराएको घटनालाई पार्टीले गम्भिरतापूर्वक लिएको छ ।

पार्टीका प्रवक्ता शरदराज पाठकले आज जारी गरेको विज्ञप्तिमा भनिएको छ – मन्त्री श्रेष्ठ पदमा बस्न अयोग्य ठहरिए । जातीय विभेद र छुवाछुतको अभियोगमा अनुसन्धानका लागि थुनामा रहेकी महिलालाई जमानतमा छुटाउन मन्त्रीजस्तो व्यक्ति प्रहरी कार्यालय नै जानुले अनुसन्धान नै प्रभावित भएको भन्दै यस्तो कार्य निन्दनीय रहेको छ– विज्ञप्तिमा उल्लेख छ ।

समाजमा रहेको यस्तो विभेदपूर्ण कार्यको मन्त्रीले विरोध गर्नुपर्नेमा उल्टो आफू चढ्ने सरकारी गाडीमा बोक्नु गलत भएको पनि उल्लेख छ ।सञ्चारकर्मी रुपा सुनुवारलाई दलित भएकै कारण बबरमहलकी सरस्वती प्रधानले डेरा भाडा नदिएको भन्दै प्रहरीले पक्राउ गरेको थियो ।