ओलीले मन्त्रीहरुलाई थपे जिम्मेवारी, गृह पौडेललाई, सञ्चार नेम्बाङलाई

१० असार, काठमाडाैं । प्रधानमन्त्री केपी ओलीले मौजुदा पाँच सदस्यीय मन्त्रिमण्डलमा जिम्मेवारी हेरफेर गरेका छन् । सर्वाेच्च अदालतले असार ८ गते चुनावी सरकारमा गरिएको पुनर्गठनलाई खारेज गरेपछि आफ्नो काँधमा थपिएका मन्त्रालयहरु मन्त्रीहरुलाई दिएका छन् ।

ओलीले आज गरेको हेरफेरमा अर्थमन्त्री विष्णु पौडेललाई गृह मन्त्रालयसमेत दिएका छन् । पौडेललाई थप उद्योग , वाणिज्य, आपूर्ति , उर्जा, जलस्रोत तथा सिंचाईको जिम्मेवारीसमेत दिएका छन् ।

यस्तै शिक्षामन्त्री कृष्णगोपाल श्रेष्ठलाई पनि वातावरण, युवा खेलकूद, श्रम रोजगार र स्वास्थ मन्त्रालयको जिम्मेवारी तोकेका छन् । यस्तै मन्त्री वसन्तकुमार नेम्बाङ सञ्चार तथा सूचना प्रविधि, कृषि, खानेपानी, भौतिक पूर्वाधार र सहरी विकासको जिम्मा दिएका छन् ।

अर्का मन्त्री लीलानाथ श्रेष्ठलाई कानूनका साथै भूमि व्यवस्था महिला बालबालिका , पर्यटन र सामान्य प्रशासन मन्त्रालयको जिम्मेवारी तोकेका छन् ।