ओलीको निरंकुशता अन्त्य हुनेछ : प्रचण्ड

२२ असार, जनकपुरधाम । नेपाल कम्युनिष्ट पार्टी माओवादी केन्द्रका अध्यक्ष पुष्पकमल दाहाल ‘प्रचण्ड’ले अब ओली युगको अन्त्य हुने ठोकुवा गरेका छन् । पार्टी नेता महादेव यादवको निधनपछि आज आयोजित श्रद्धाञ्जली सभालाई संवोधन गर्दै प्रचण्डले भने – केपी ओलीको निरंकुशतन्त्रबाट अब भने मुलुकले छुटकारा पाउने छ ।

सर्वाेच्च अदालतले विपक्षी गठबन्धनका नेता शेरबहादुर देउवालाई प्रधानमन्त्रीमा नियुक्त गर्न परमादेश जारी हुने उनले विश्वास व्यक्त गरे ।सर्वाेच्च अदालतसमक्ष १४६ जना सांसद्ले सशरीर उपस्थित भएर हस्ताक्षर गरेको नेपालको इतिहासमै पहिलो घटना भएको भन्दै देउवालाई प्रधानमन्त्री नियुक्त गर्ने आधार यो भन्दा बलियो अरु के हुन सक्ला ? उनले प्रश्न गरे ।

प्रतिनिधिसभा पुनस्थापना भएपछि पाँच वर्ष पूरा अवधि काम गरेर राजनीतिक स्थिरता दिने पनि उनले विश्वास व्यक्त गरे । अदालतले नै वैकल्पिक सरकार बन्ने अवस्था रहेसम्म विघटन हुँदैन भन्ने नजीर स्थापना गरिसकेको स्मरण गर्दै अध्यक्ष प्रचण्डले भने– त्यसैले पनि पुनस्थापनाको आधार तयार भइसकेको छ ।

संविधान र लोकतन्त्रमाथि ओलीले निरन्तर प्रहार गरेको भन्दै उनले अब भने त्यसको संरक्षण र सम्वर्धनका लागि आफूहरु प्रतिवद्ध रहेको बताए ।