माओवादी अध्यक्ष प्रचण्डको अस्वाभाविक दौडधुप

२६ असार, काठमाडौं । सत्तारुढ दल एमालेको विवाद सुल्झन लागको बेला माओवादी केन्द्रका अध्यक्ष पुष्पकमल दाहाल ‘प्रचण्ड’ को अस्वाभाविक दौडधुप वढेको छ । शनिवार विहान माधव नेपा निवास पुगेका अध्यक्ष प्रचण्ड दिउसो शेरबहादुर देउवालाई भेट्न बूढानीलकण्ठ पुगेका थिए । सर्वाेचच अदालतले प्रतिनिधीसभा विघटनको मुद्दामा २८ असारमा निर्णय दिन लागेको र एमालेभित्र आन्तरिक विवाद सुल्झन लागेको बेला एकै दिन माओवादी अध्यक्ष प्रचण्डले नेता नेपाल र कांग्रेस सभापति देउवालाई भेटेका हुन् ।

एमाले नेता निवास पुगेर प्रचण्डले ओलीसँग मिल्न लागेको हो भनेर जानकारी लिएका थिए भने देउवासँग अहिलेको गठबन्धन धरापमा परेको भन्दै चिन्ता व्यक्त गरेका थिए । करिब डेढ घण्टा नेपालसँग विताएका प्रचण्डले एमालेभित्रको आन्तरिक एकता, कांग्रेस, माओवादी केन्द्र लगायत विपक्षी दलको गठवन्धनको मोर्चावन्दी लगायतका विषयमा केन्द्रीत रहेर छलफल गरेको स्रोतको दावी छ ।

त्यसक्रममा नेपालले आफुले सर्वाेच्च अदालतको हस्ताक्षर फिर्ता लिने या त्यसको निर्णय प्रभावित हुने गरी अन्यत्र थप कुनै कदम नचाल्ने वचनवद्दता आज पनि प्रचण्डलाई दिएका थिए । एमालेको मस्यौदामा पनि सोही सहमति भएको थियो । नेपालको वलियो वचनवद्धताको खोजीमा नेपाल निवास पुगेरै छलफल गरेका प्रचण्ड नेपालसँगको छलफलका बारेमा जानकारी दिने र आगामी थप रणनीतिका बारेमा छलफल गर्नका लागि अहिले देउवानिवास पुगेका हुन् ।

प्रधानमन्त्री केपी ओलीले अहिले विपक्षी गठवन्धनमै रहेका नेपाल समुहका नेताहरुलाई त्यहाँबाट बाहिर निकाल्ने प्रयास गरिरहेका छन् । एमालेभित्रको विवाद मिलेमा गठवन्धन लाई पर्ने असरका वारेमा पनि नेताहरुका वीचमा आन्तरिक छलफल हुने गरेको छ ।

अहिले एमाले विवाद सहमति नजिक रहेको भनिएका बेला नेपालको आगामी थप रणनीति के होला ? भन्नेमा सवैभन्दा चासो प्रचण्ड र देउवाले देखाईरहेका छन् । शुक्रबार साँझ मात्रै एमालेको विवाद निरुपण गर्नका लागि कार्यदलका सदस्यहरुले धेरै हदसम्म सहमति भैसकेको बताएका थिए । एमालेको विवाद मिलेको अवस्थामा प्रचण्ड कोटेश्वर र बूढानीलकण्ठ पुग्नुलाई राजनीतिक वृत्तमा अर्थपूर्ण रुपमा लिइएको छ ।

दुई नेताहरुसँग समसामयिक राजनीतिक विषयमा कुराकानी भएको प्रचण्ड निकट स्रोतले जनाएको छ । विपक्षी ५ दलीय गठबन्धन र नेकपा एमाले भित्र भइरहेको वार्ताका बारेमा नेपाल र प्रचण्डबिच छलफल भएको बताइएको छ । एमालेको किचलो मिलाउन केही दिन यता विवाद समाधान कार्यदलमा वार्ता भइरहेको छ ।

शुक्रवारको वार्ता पछि मस्यौदामा भएको सहमतिलाई आज अन्तिम रुप दिई पार्टी अध्यक्ष केपी ओली र नेता नेपाललाई बुझाउने तयारी भएको छ । एमालेको वार्ता निष्कर्षमा पुग्नलागेका बेला प्रचण्ड–नेपालबिच वार्ता भएको हो । यसअघि पनि प्रचण्ड नेपालबिच बेला बेलामा गठबन्धनको रणनीतिका बारेमा भेटवार्ता हुँदै आएको छ ।

शुक्रबार कार्यदलको बैठकमा माधव नेपाल पक्षका नेताहरु विपक्षी दलका नेता शेरबहादुर देउवालाई प्रधानमन्त्री बनाउन गरेको हस्ताक्षरको सम्बन्धमा कुनै पनि धारणा सार्वजनिक नगर्ने र अदालतलाई प्रभाव र दबाब पर्नेगरी कुनै पनि विषयवस्तु उल्लेख नगर्ने सहमति भएको थियो ।