क्लबविहीन मेस्सी आधा तलबमा बार्सिलोनामै बस्ने

३१ असार, एजेन्सी । आर्जेन्टिनाका लागि कोपा अमेरिका २०२१ जिताएपछि बिदामा रहेका लियोनेल मेस्सी आधा तलबमा पाँच वर्ष बार्सिलोना फुटबल क्लबमै बस्ने भएका छन् ।

मेस्सी पहिलेको भन्दा आधा तलबमा सन् २०२६ को अन्त्यसम्म बार्सिलोना फुटबल क्लबबाट खेल्न सहमत भएकाे बीबीसीले जनाएकाे हाे । तर यो घोषणाको कार्यान्वयनका लागि बार्सिलोनाले मेस्सीको तलब जुटाउन केही खेलाडीहरू छोड्नुपर्ने बताइएको छ ।

जुन ३० मा उनको वार्षिक तलब १२ करोड ३० लाख पाउन्ड भनिएको सम्झौता समाप्त भएपछि उनी क्लबविहीन भएका थिए। यता नयाँ अध्यक्ष जोन लापोर्टाले मेस्सीसँग सम्झौता गर्नु आफ्नो प्रमुख लक्ष्य भएको बीबीसीसँगको कुराकानीमा बताएका छन् ।