देउवा पनि दुईतिहाई नजिक : यी हुन पार्टी ह्विप उल्लंघन गर्ने एमालेका २२ सांसद

३ साउन, काठमाडाैं । नेकपा एमालेका २२ सांसदले प्रधानमन्त्री शेरबहादुर देउवालाई विश्वासको मत दिएर पार्टी ह्वीप उल्लंघन गरेका छन्।

आइतबार संसद भवन नयाँ बानेश्वरमा भएको मतदानमा एमालेका अध्यक्ष केपी ओली पक्षका ८ र वरिष्ठ नेता माधवकुमार नेपाल पक्षका १४ जनाले विश्वासको मतको पक्षमा मत दिएका हुन् । नेपाल पक्षका १० सांसद भने मत नदिई संसद भवनबाट बाहिरिएका थिए ।

देउवालाई मत दिनेमा माधवकुमार नेपाल, विरोध खतिवडा, जीवनराम श्रेष्ठ, कल्याणी खड्का, मेटमणि चौधरी, भवानी खापुङ, मुकुन्द न्यौपाने र गोपाल बम छन्। यस्तै देउवालाई मतदान गर्ने नेपाल समूहका अन्य सांसदमा सरला यादव, पुष्पाकुमारी कर्ण, लक्ष्मी चौधरी, निरादेवी जैरु, रामकुमारी झाँक्री र कृष्णलाल महर्जन छन्।

एमालेकै ओली पक्षका हीरा केसी, पार्वती विसुंखे, कलिला खातुन, विनादेवी बुढाथोकी, धनबहादुर बुढा, समिमा हुसेन, प्रेम आले, कृष्णकुमार श्रेष्ठ किसानले पनि देउवाका पक्षमा मतदान गरेका छन्।

प्रधानमन्त्री शेरबहादुर देउवाले संसद्मा विश्वासको मत पाएका छन्। प्रतिनिधिसभाको आइतबार बसेको दोस्रो बैठकमा देउवाले संसदमा रहेका कुल सांसद संख्याको १६५ मत पाएका हुन्।

त्यस्तै देउवालाई ८३ जना सांसदले विश्वासको मत दिएनन्। यस्तै एक सांसद तटस्थ बसेका थिए। मतदानमा २४९ सांसद सहभागी रहेको सभामुख अग्नि सापकोटाले जानकारी दिए।

एमाले अध्यक्ष एवम् पूर्व प्रधानमन्त्री केपी ओली पक्षमा लागेका जसपाका महन्थ ठाकुर पक्षका सांसदहरुले समेत साथ दिएपछि उनले सजिलै विश्वासको मत प्राप्त गरेका हुन्।