२२ जनालाई कारबाहीको तयारी तर कुन अन्योलग्रस्त

५ साउन, काठमाडौं । नेकपा एमालेले प्रधानमन्त्री शेरबहादुर देउवालाई विश्वासको मत दिएको भन्दै २२ जना सांसद्लाई कारबाही गर्ने भएको छ । तर आधार भने अर्कै देखाएको छ ।

सर्वाेच्च अदालतको गत असार २८ गतेको फैसलाले संविधानको धारा ७६ (५) बमोजिम ह्वीप नलाग्ने निर्णय गरेकाले उनीहरुलाई कारबाही गर्न नमिल्ने देखिएको हो । त्यसैले हिजो सोधिएको स्पष्टीकरणमा आरोप चाहिं बेग्लै लगाइएको स्रोतले बतायो ।

स्रोतका अनुसार, हिजोको केन्द्रीय कमिटी बैठकले सोधेको स्पष्टीकरणमा गत वैशाख २७ गते तत्कालिन प्रधानमन्त्री केपी ओलीलाई किन मत नदिएको भन्ने प्रश्न राखिएको छ ? तर यसो गर्दा पनि २२ जनालाई त्यही ब्यहोराको स्पष्टीकरण सोध्न नमिल्ने भन्दै बैठकमै प्रश्न उठाइएको थियो ।

किनभने देउवालाई मत दिनेमा २७ गते ओलीलाई मत दिनेहरु समेत रहेका छन् । त्यसैले सबैलाई एउटै आसयको पत्र दिन नमिल्ने भएकाले अलग व्यहोरा राखिएको छ ।

अहिले मात्र देउवालाई मत दिनेहरुको हकमा भने बेग्लै निर्णय गरिने स्रोतले बतायो । त्यसमा पूर्व मन्त्री प्रेम आले , किसान श्रेष्ठ लगायत ८ जना रहेका छन् । एमालेको आज पनि केन्द्रीय कमिटी बैठक जारी छ ।