ओलीले गरेका राजनीतिक नियुक्ति खारेज गर्न देउवा–प्रचण्ड सहमत

५ साउन, काठमाडौं । तत्कालीन प्रधानमन्त्री केपी ओलीले राज्य संयन्त्रको चरम दोहन गरेको भन्दै व्यापक आलोचना भयो । तर ओलीले कसैलाई सुनेनन् । बरु उनले अध्यादेशमार्फत ऐन कानून शंशोधन गर्दै मनमानी गरे ।

त्यसमध्येकै एउटा प्रकरण हो – संवैधानिक आयोगमा जथाभावी नियुक्ति । प्रमुख प्रतिपक्षी दल र सभामुखलाई समेत छायामा पारेर ओलीले आफ्ना मान्छे बिना आकार र प्रकृया नियुक्त गरे । त्यसबारे सर्वत्र आलोचना भयो । न्यायलयमा समेत यसबारे प्रश्न उठाइएको छ । तर सुनुवाई भने केही भएको छैन ।

अहिले सत्ता फेरिएको छ । धेरैको चासोको विषय रहेकाले यसबारे केही गर्नै पर्ने वाध्यता सरकार सामु रहेको छ ।प्रधानमन्त्री शेरबहादुर देउवाले ती नियुक्ति खारेज गर्ने विषय प्रतिपक्षमै रहँदा उठाएका हुन् । अहिले त्यसलाई कार्यान्वयन गर्ने बेला बनेको छ ।

त्यसैले आज प्रधानमन्त्री देउवाले सत्ता घटक नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’सँग यसबारे मिहिन छलफल गरेका छन् ।

देउवा र प्रचण्डबीच ओलीले प्रतिनिधिसभा विघटन गरेयता गरेका सबै राजनीतिक एवं संवैधानिक नियुक्ति खारेज गर्ने सहमति बनेको छ । सम्भवतः अब बस्ने मन्त्रिपरिषद बैठकले यसबारे टुंगो लगाउने छ ।