देउवा दाहाल पत्नी सीताको स्वास्थ्यस्थिति बुझ्न खुमलटार

५ साउन, काठमाडौं । प्रधानमन्त्री एवं नेपाली कांग्रेसका पार्टी सभापति शेरबहादुर देउवा माओवादी अध्यक्ष पुष्पकमल दाहाल प्रचण्डलाई भेट्न खुमलटारस्थित उनको निवास पुगेका छन् । खुमलटारमा दुई नेताहरुबीच वार्ता चलिरहेको छ ।

यसअघि मंगलबार बिहान नै माओवादी अध्यक्ष दाहालले बालुवाटार पुगेर प्रधानमन्त्री देउवासँग भेट गरेका थिए । भेटमा सरकारमा सहभागिताको विषयलगायत विकसित पछिल्ला राजनीतिक घटनाक्रमबारे छलफल भएको बुझिएको छ ।

मन्त्रिमण्डल विस्तारमा पनि नेता दाहाल र देउवा छलफल गरिरहेका छन् । आज विहानै प्रचण्डले वालुवाटार पुगेर देउवासँग छलफल गरेका थिए भने माधव नेपालसँग पनि छलफल गरेका थिए ।

साे अवसरमा प्रधानमन्त्री देउवाले अध्यक्ष दाहाल पत्नी सीता दाहालको स्वास्थ्यस्थिति बारे पनि जानकारी लिएका छन् । अध्यक्ष दाहालका प्रेस विज्ञ विष्णु सापकोटाका अनुसार प्रधानमन्त्रीले पहिल्यैदेखि सीता दाहालको स्वास्थ्य अवस्थाको बारेमा बुझ्न खोज्दै थिए, सोही क्रममा आज खुमलटार पुगेको बताइएको छ ।  पार्किन्सन्. रोगका कारण लामो समयदेखि उनी अस्वस्थ छिन् ।