राष्ट्रपति र ओलीबीच भेटवार्ता, के भयाे कुराकानी ?

८ साउन, काठमाडौं । राष्ट्रपति विद्यादेवी भण्डारी र प्रमुख विपक्षी दलका नेता तथा पूर्वप्रधानमन्त्री केपी ओलीबीच भेटवार्ता भएको छ । शुक्रबार शितल निवासमा भएको भेटवार्तामा समसामयिक विषयमा छलफल भएको हाे ।

राष्ट्रपति र प्रमुख विपक्षी दलको नेता बीचको भेटघाटका सम्बन्धमा अहिलेसम्म राष्ट्रपति कार्यालय र विपक्षी दलको नेताको सचिवालय कसैले पनि औपचारिक रुपमा के थियो एजेन्डा केही जानकारी गराइएको छैन ।

राष्ट्रपतिलाई भेट्नुपर्ने परिभाषित जिम्मेवारीमा नरहेका विपक्षी नेतासँग राष्ट्रपतिको के कुरा भएको हुनसक्छ ? यो आम चासोलाई शीतलनिवास र विपक्षी दलका नेताको सचिवालयले केही उल्लेख गरेका छैनन् ।

प्रधानमन्त्रीबाट हटेको दुई साता नपुग्दै राष्ट्रपति भण्डारी र ओलीबीचको भेटवार्तालाई अर्थपूर्ण रुपमा हेरिएको छ ।यसअघि प्रधानमन्त्री रहेका बेला ओली र राष्ट्रपति भण्डारीबीचको मिलेमतोमा प्रतिनिधिसभा विघटन गर्नेदेखि विभिन्न अध्यादेश ल्याइएको भन्दै चर्को आलोचना भएको थियो । ओली गत असार २८ को सर्वोच्च अदालतको आदेशपछि प्रधानमन्त्रीबाट हटिसकेका छन् ।

राष्ट्रपति भण्डारीले यसअघि केपी ओली प्रधानमन्त्री हुँदा प्रमुख विपक्षी दलका नेता शेरबहादुर देउवालाई यसरी भेटेकी थिइनन् ।