चौथो त्रैमासको वित्तीय विवरण सार्वजनिक गरेको सिटिजन्स बैंकको लाभांश क्षमता कति ?

१५ साउन, काठमाडौं । सिटिजन्स बैंक इन्टरनेशनल लिमिटेडले गत आर्थिक वर्षको चौथो त्रैमाससम्मको वित्तीय विवरण सार्वजनिक गरिसकेको छ ।

असार मसान्तसम्ममा बैंकले १ अर्ब ५९ करोड ८७ लाख रुपैयाँ मुनाफा कमाएको छ। यो अघिल्लो आवको सोही अवधिको तुलनामा ३३.४० प्रतिशत बढी हो। चौथो त्रैमाससम्म बैंकको ब्याज आम्दानी र सञ्चालन मुनाफा बढेसँगै बैंकको मुनाफा बढ्न पुगेको हो।

सो अवधिसम्ममा बैंकको वितरण योग्य मुनाफा १ अर्ब ५७ करोड ८५ लाख रुपैयाँ रहेको छ। जुन अघिल्लो आर्थिक वर्षको सोही अवधिको तुलनामा ९१.५७ प्रतिशत बढी हो।

कम्पनीको सार्वजनिक गरेको चौथो त्रैमासको वित्तीयको आधारमा बैंकले शेयरधनीलाई दिन सक्ने लाभांश क्षमता कति ? बैंकले शेयरधनीलाई कतिसम्म लाभांश वितरण गर्नसक्छ ? असार मसान्तको वित्तीय विवरणलाई हेर्दा बैंकले शेयरधनीलाई दिन सक्ने लाभांश क्षमता १३ दशमलव ५१ प्रतिशत रहेको छ ।

हाल कम्पनीको चुक्ता पुँजी ११ अर्ब ६६ करोड रहेको छ । कम्पनीको वितरणयोग्य मुनाफा १ अर्ब ५७ करोड ८५ लाख ÷ चुक्ता पुँजी × १०० गर्दा कम्पनीको लाभांश क्षमता आउँछ । जसअनुसार कम्पनीको लाभांश क्षमता १३ दशमलव ५१ प्रतिशत रहेको छ ।

कम्पनीले अघिल्लो आवको मुनाफाबाट गत वर्ष शेयरधनीलाई ८ प्रतिशत बोनस शेयर र ३ प्रतिशत नगद गरी ११ प्रतिशत लाभांश वितरण गरेको थियो ।