अमेजनमाथि हालसम्मकै ठूलो जरिवाना

१७ साउन, एजेन्सी । अमेजनमाथि हालसम्मकै ठूलो जरिवाना तोकिएका छन् । गोपनीयता कानूनको उल्लंघन गरेको भन्दै युरोपियन युनियनले इ-कमर्श कम्पनी अमेजनमाथि ठूलो जरिवाना गरेको सीएनएनले जनाएको छ ।

विज्ञापनसँग सम्बन्धित विषयमा अमेजनले जनरल डाटा प्रोटेक्सन रेगुलेसनको उल्लंघन गरेको ठहर गर्दै युरोपियन युनियन अन्तर्गतको नियामक निकायले अमेजनमाथि ७४ करोड ६० लाख युरो अर्थात् १ खर्ब रुपैयाँ भन्दा धेरै रकम जरिवाना गरेको समाचारमा जनाइएको छ ।

इयूको उक्त निर्णय गत जुलाई १६ मै भएको भएपनि शुक्रबार मात्र सार्वजनिक गरिएको हो । इयूमा उक्त कानून लागू भएयता अमेजनमाथिको यो जरिवाना हालसम्मकै ठूलो हो । यसअघि सन् २०१९ मा गुगलमाथि ५ करोड युरो जरिवाना गरिएको थियो ।

व्यक्तिगत डाटाको प्रशोधनमा अमेजनले जनरल डाटा प्रोटेक्सन रेगुलेसनको पालना गरेको छैन । अमेजनले भने आफूमाथि इयूले लगाएको जरिवाना तर्कसंगत नरहेको र यस निर्णयका विरुद्धमा न्यायिक उपचार खोज्ने माचारमा जनाएको छ ।

लक्जेम्बर्गस्थित डाटा नियामक निकायले अमेजनमाथिको उक्त जरिवानाको निर्णय गरेको हो । स्मरण रहोस् लक्जेम्बर्गमै अमेजनको युरोपस्थित मुख्यालय रहेको छ ।