खैरो हिरोइनसहित पक्राउ परेका वडाध्यक्षलाई छुट्याउन पैसाको चलखेल

१९ साउन, बीरगञ्ज । ईलाका प्रहरी कार्यालय पोखरियाले लागुऔषध खैरो हिरोइनसहित सार्वजनिक गरेको पकहामैनपुर गाउँपालिकाका वडा नम्बर १ का वडाध्यक्ष अमिरका सहनीलाई छुट्याउन मन्त्रालयसम्म दौडधूप चलेको छ ।

वडाध्यक्ष सहनीसहित पक्राउ परेका तिनै जनालाई छुट्याउन २५ लाखसम्मको कुरा भइरहेको एक स्रोतले जनाएको छ । स्रोतका अनुसार इलाका प्रहरी कार्यालय पोखिरयाका प्रहरी निरीक्षक दीपक थापालाई विभिन्न किसिमको तनाव र राजनीतिक दबाव समेत दिइएको छ ।

बीरगञ्ज महानगरपालिकाको वडा नम्बर १९ वर्वा नजिकैबाट सरकारी मोटरसाईकलसहित गत साउन ३ गते पक्राउ परेका वडाध्यक्ष सहनीको बारेमा केहीले दवाव सृजना गरेपनि अनुसन्धानमा कुनै प्रभाव नपर्ने पर्सा प्रहरी प्रवक्ता एवं प्रहरी नायब उपरीक्षक ओमप्रकाश खनालले बताए । साथै ९० दिनसम्म म्याद थपेर कारवाही प्रक्रिया बढाउन मिल्ने हुँदा दवाव आएपनि प्रहरीको अनुसन्धानमा कुनै किसिमको आशंका नगर्न उनले अपिल गरेका छन् ।

लागुऔषध ऐन २०३३ अनुसार दोषी ठहर भएमा १० देखि १५ वर्षसम्म कैद र ७५ हजार रुपैयाँदेखि २ लाखसम्म जरिवानाको सजाय व्यवस्था रहेको छ ।