देउवालाई किन चढ्यो कुलमानको भूत ?

१९ साउन, काठमाडौं । पाँच दलीय गठबन्धनको नेतृत्व गरेका नेपाली कांग्रेसका सभापति एवं प्रधानमन्त्री शेरबहादुर देउवालाई अकस्मात कुलमान घिसिङको भूत सवार भएको छ ।

१८ घण्टे लोडसेडिङ हटाएपछि जनतामाँझ लोकप्रिय बनेका नेपाल विद्युत प्राधिकरणका पूर्वकार्यकारी निर्देशक घिसिङलाई प्राधिकरणमा पुनः ल्याउन प्रधानमन्त्री देउवाले उर्जामन्त्री पम्फा भूसाललाई ठाडो निर्देशन दिएको चर्चाले यतिबेला सामाजिक सञ्जाल रंगिएको छ ।

मंगलबार ऊर्जा मन्त्री पम्फा भुसाललाई बालुवाटारमा बोलाएर प्रधानमन्त्री शेरबहादुर देउवाले प्राधिकरणका पूर्वकार्यकारी निर्देशक घिसिङलाई नियुक्त गर्ने प्रक्रिया सुरू गर्न निर्देशन दिएका हुन् ।

प्रधानमन्त्रीको निर्देशनपछि उर्जामन्त्री भुसालले प्राधिकरणका अहिलेका कार्यकारी निर्देशक हितेन्द्रदेव शाक्यलाई बोलाएर राजीनामा दिन भनेकी छन् । स्रोतका अनुसार शाक्यले राजीनामा नदिए सरकारले उनलाई स्पष्टीकरण सोध्ने समेत तयारी गरेको छ।

यसअघि पनि प्राधिकरणको कार्यकारी निर्देशक रहेका कुलमानलाई नै दोहोर्‍याउन दबाब थियो । तर तत्कालीन प्रधानमन्त्री केपी ओली सरकारले उनलाई नदोहोर्‍याउने निर्णय लिएको थियो।

अघिल्लो कार्यकालमा कुलमानको पालामा लोडसेडिङ हटेको थियो भने लामो समय घाटामा रहेको प्राधिकरणलाई कृत्रिम मुनाफामा ल्याएका तथ्याङ प्रस्तुत गरेका थिए । उनको चार वर्षे कार्यकाल सकिएपछि तत्कालीन ओली नेतृत्वको सरकारले उनको पुनर्नियुक्ति गरेको थिएन । प्रचारबाजीको भोको रहेका कुलमानले सामाजिक सञ्जाल र पत्रपत्रिकामा करोडौं खर्च गरेर आफू हाईहाई बनेको आरोप लागेको थियो ।

यता अहिलेका कार्यकारी निर्देशक शाक्यलाई राजीनामा दिन भनेपनि उनले राजीनामा दिन्छन कि नाई यो सबैको चासोको बिषय भनेको छ । यदि जवरजस्ती शाक्यलाई हटाइएमा उनी अदालतमार्फत पुर्नस्थापित हुने कुरा भने निश्चित प्राय छ ।