सूर्या लाइफ इन्स्योरेन्सको अधिकांश सूचकमा सुधार

२८ साउन, काठमाडौं । सूर्या लाइफ इन्स्योरेन्सले गत आर्थिक वर्षको चौथो त्रैमाससम्मको वित्तीय विवरण सार्वजनिक गरेको छ। विवरण अनुसार इन्स्योरेन्सले अधिकांश सूचकमा सन्तोषजनक सुधार गरेको छ।

गत आर्थिक वर्षको अन्त्यसम्ममा इन्स्योरेन्सले ४ अर्ब १८ करोड २० लाख रुपैयाँ खुद बीमाशुल्क आर्जन गरेको छ। यो अघिल्लो आर्थिक वर्षको तुलनामा ४६.९७ प्रतिशत बढी हो। समीक्षा अवधिमा इन्स्योरेन्सको खुद नाफा २३.०१ प्रतिशत बढेर ३२ करोड ३२ लाख रुपैयाँ पुगेको छ।

गत आर्थिक वर्षमा ५ प्रतिशत बोनस शेयर वितरण गरी चुक्ता पूँजी बढाएको यस इन्स्योरेन्सको जगेडा कोष समीक्षा अवधिमा २५.२५ प्रतिशत बढेको छ। त्यसैगरी, समीक्षा अवधिमा इन्स्योरेन्सको जीवन बीमा कोष ४३.५४ प्रतिशत र महाविपत्ति कोष ३३.७८ प्रतिशत बढेको छ। इन्स्योरेन्सले सो अवधिसम्ममा जीवन बीमा धितो बापत १ अर्ब १६ करोड ३० लाख रुपैयाँ कर्जा लगानी गरी १० लाख ८ हजार रुपैयाँ आम्दानी गरेको छ।

खुद नाफासँगै इन्स्योरेन्सको प्रतिशेयर आम्दानी पनि बढेको छ। असार मसान्तसम्ममा इन्स्योरेन्सको १४ रुपैयाँ २९ पैसा रहेको छ। जुन अघिल्लो आर्थिक वर्षको तुलनामा २ रुपैयाँ ९ पैसा बढी हो। सो अवधिसम्ममा इन्स्योरेन्सको मूल्य आम्दानी अनुपात ३६.५४ गुणा रहेको छ भने प्रतिशेयर नेटवर्थ १३२ रुपैयाँ ३९ पैसा रहेको छ।