स्वास्थ्य बीमा कार्यक्रमका फोकल पर्सन नै ठगिए अस्पतालबाट

१३ भदौ, चितवन । भरतपुर अस्पतालको स्वास्थ्य बीमा कार्यक्रमका फोकल पर्सन नारायण सापकोटा आफैले हेर्ने बीमा कार्यक्रमबाट ठगिएका छन् । उनले आफ्नो श्रीमतीको पित्तथैलीको शल्यक्रिया गर्दा बीमावापत २७ हजार ५०० दाबी गरे । तर सो अस्पतालमा त्यो औषधि नभएको भन्दै बाहिरबाट चार हजारको औषधि उनले किन्नुपर्यो ।

आम नागरिक झैं बीमाबाट रकम काट्ने र छुट्टै औषधि किन्नु पर्दा आफू पनि मर्कामा परेको उनले स्वीकार गरे । बीमा बोर्डसँग भरतपुर अस्पतालले शल्यक्रियाको औषधि, परीक्षण, श्यया, शल्यक्रिया शुल्कलगायत सबैको प्याकेजमा रकम तय भएको छ । अस्पतालले शल्यक्रिया गर्दै गर्दा आफूले सुविधा दिन नसकेपनि पूरै रकम सेवाग्राहीको खाताबाट दाबी गरेर बीमा बोर्डसँग लिने गर्दछ । सापकोटाले भने, “औषधि उपलब्ध गराउने जिम्मा अस्पतालको हो”, दोहोरो खर्च गराउनु गलत भएको उनले बताए ।

बीमाले लगभग ८० प्रतिशत औषधि समेटेको भएपनि अस्पतालले दिन नसकेको उनको भनाई छ । अस्पतालमा औषधि नहुँदा शल्यक्रियासँगै दमका बिरामी, ज्वरोका बिरामी पनि मर्कामा पर्ने गरेको सापकोटाको भनाई छ । अस्पताल र बीमा बोर्डका बीचमा पित्तथैलीको ल्याबकोली (मेसिनबाट गरिने शल्यक्रिया) गर्दा प्याकेजमा रु २७ हजार ५०० दाबी गर्ने उल्लेख छ भने चिरेर शल्यक्रिया गर्दा १८ हजार उल्लेख छ ।

त्यस्तै एपेन्डिसाइडको १५ हजार ५०० रहेको छ । सापकोटाको भनाईमा सबै शल्यक्रियाको दररेट छ । अस्पतालका मेडिकल सुपरिटेण्डेन्ट डा. रोशन न्यौपाने अस्पतालमा अधिकांश औषधि आपूर्ति गराउन आफूहरु लागि परेको बताउछन् । औषधि दिन नसकेको उनले स्वीकार गरे । प्रत्यक्ष रुपमा बिरामी प्रभावित भएको विषयमा थप बुझ्ने न्यौपानेको भनाई छ ।

बीमा बोर्डका कार्यकारी निर्देशक डा. दामोदर बसौला औषधि उपलब्ध नगराएर रकम दाबी गर्न नपाउने बताए । यस विषयमा प्रत्यक्ष रुपमा अस्पतालमा कर्मचारी पठाएर बुझ्ने उनको भनाई छ । सरकारी अस्पतालले राम्रो गर्छन् भन्ने उद्देश्यका साथ बीमा कार्यक्रमको पहिलो विन्दु सरकारी अस्पताल बनाइएको भन्दै उनले बिरामी र बोर्ड कोही पनि ठगिन नहुने बताए ।

भरतपुर अस्पताल यस क्षेत्रमा बीमामा धेरै दाबी गर्ने अस्पताल पर्दछ । यस अस्पतालले मासिक दुई करोड भन्दा बढी बीमाबाट रकम दाबी गर्दछ ।