७ आश्विन २०७८, बिहीबार

जनकपुरधाम उपमहानगरपालिकाद्वारा शिक्षा क्षेत्रमा मनपरी खर्च

प्रकाशित मिति :  २३ भाद्र २०७८, बुधबार १३:३५


◊ वीरेन्द्र रमण

२३ भदौ, जनकपुर । जनकपुरधाम उपमहानगरपालिकामा शिक्षा क्षेत्रको अवस्था भद्रगोल देखिएको छ । संविधानमा स्थानीय तहलाई अधिकार दिए पनि शिक्षामा सुधार आउनुको साटो लथालिंग र वित्तीय अनुशासनको आभाव देखिएको छ ।

महालेखापरीक्षक कार्यालयको ५८औं प्रतिवेदनमा जनकपुरधाम उपमहानगरपालिकाको शिक्षा क्षेत्रको अवस्था निकै दयनीय रहेको उल्लेख छ ।उपमहानगरका दिवा खाजा खर्चमा समेत अनियमितता देखिएको छ ।

पालिकाले ४८ वटा विद्यालयलाई एक करोड ५० लाख ७९ हजार ६ सय ८३ रुपैयाँ निकासा दिएको छ । विद्यार्थीको संख्या, हाजिर भएको दिन र विद्यार्थीलाई खाजा खुवाएको सुनिश्चित हुने प्रमाण पेस गरेको नदेखिएको प्रतिवेदनमा उल्लेख छ ।

कक्षा १ देखि १० सम्म विद्यार्थीहरूलाई निःशुल्क पाठ्यपुस्तकबापत ७६ लाख रुपैया खर्च गरेको छ । तर सो पाठ्यपुस्तक पाएको वा नपाएको, त्यसको अनुगमनको आभावसमेत देखिएको छ ।

उपमहानगरपालिकाले विद्यार्थीहरूलाई छात्रवृत्तिबापत ४९ लाख २० हजार रुपैयाँ वितरण गरिएको छ । तर, त्यसको प्रतिवेदनसमेत नपाइएको महालेखाले जनाएको छ । उपलब्ध गराइएको छात्रवृत्तिमा दलित, अपांगता, छात्रछात्रालाई उपलब्ध गराइएको विवतरणसमेत उपलब्ध नभएको महालेखाले औंल्याएको छ ।

अनुदानबापत मदरसालाई उपमहानगरपालिकाले ३६ लाख १५ हजार रुपैयाँ निकासा गरेको छ । उपमहानगरपालिकाले निर्माण काम सम्पन्न नै नभएको अवस्थामा समेत गोगलप्रसाद नमुना माध्यमिक विद्यालयलाई ५१ लाख ५६ हजार नौ सय ९९ रुपैयाँ र यज्ञवल्क्य संस्कृत विद्यालयलाई ४९ लाख ९५ हजार रुपैयाँ निकासा गरेको पाइएको छ ।

दुवै विद्यालयले नियमविपरीत कार्य गरेको र महलेखाले विद्यालयको निर्माण कार्यको अनुमगन गर्ने पदाधिकारी तथा विद्यालयलाई कारबाही गर्न सुझाव दिएको छ ।


नेपालबहस डटकमको अंग्रेजी संस्करणका साथै अनलाइन टिभी पनि सञ्चालित छ । फेसबुक र ट्वीटरमार्फत पनि हामीसँग जोडिन सकिनेछ । नेपालबहसमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया दिनुहोस !
छुटाउनुभयो कि?
ताजा