सर्वसाधारणले बुधबारदेखि आईपीओ भर्न पाउने

३१ भदौ, काठमाडौं । सर्वसाधारण लगानीकर्ताले असोज ६ गते बुधबारदेखि साहस उर्जा कम्पनीको आईपीओमा आवेदन दिन पाउने भएका छन् । कम्पनीले कर्मचारी, सामुहिक लगानी कोष र सर्वसाधारण लगानीकर्ताको लागि ७० करोड रुपैयाँ बराबरको ७० लाख कित्ता आईपीओ निष्कासन गर्न लागेको हो ।

सर्वसाधारण लगानीकर्ताले १०० अंकित मूल्यमा न्यूनतम १० कित्तादेखि अधिकतम दश लाख कित्ताको लागि आवेदन दिन सकिनेछ । सो आईपीओमा असोज १० गतेसम्म आवेदन दिन पाइनेछ

निष्काशन गरिने कुल ७० लाख कित्ता शेयरमध्ये ३ प्रतिशत अर्थात २ लाख १० हजार कित्ता शेयर कर्मचारीहरुका लागि र ५ प्रतिशत अर्थात ३ लाख ५० हजार कित्ता शेयर सामूहिक लगानी कोषका लागि छुट्याइएको छ। सर्वसाधारणले बाँकी ६४ लाख ४० हजार कित्ताका लागि आवेदन दिन सक्नेछन्।

आईपीओ निष्काशनका लागि गराएको रेटिङ्गमा इक्रा नेपालले कम्पनीलाई इक्राएनपि आईआर डबल बी प्लस रेटिङ्ग प्रदान गरेको छ। यसले कम्पनीले वित्तीय दायित्व पुरा गर्न सक्ने सम्बन्धमा मध्यम जोखिम रहेको जनाउँदछ।

कम्पनीको धितोपत्र निष्काशन तथा बिक्री प्रबन्धक एनआईबिएल एस क्यापिटल लिमिटेड रहेको छ। सर्वसाधारणले नेपाल धितोपत्र बोर्डबाट स्वीकृति प्राप्त गरेका सम्पूर्ण सि–आस्बा सदस्य बैंक तथा वित्तीय संस्थाहरु तथा तिनका शाखा कार्यालयबाट आवेदन दिन सक्नेछन्।