एक हजार क्षमताको सभागृह निर्माणको काम ९० प्रतिशत सम्पन्न

५ असोज, काठमाडौं । उद्योग वाणिज्य संघ दाङ्द्वारा घोराहीमा निर्माणाधीन बहुउद्देश्यीय सभागृह निर्माणको काम ९० प्रतिशत सम्पन्न छ । करिब एक हजार क्षमताको सो सभागृह विसं २०७४ देखि निर्माण सुरुआत गरिएको थियो ।

जिल्लामा सभागृह नहुँदा राष्ट्रियस्तरका ठूला कार्यक्रम गर्न अप्ठेरो अवस्था थियो । घोराही उपमहानगरपालिका–१४ मा करिब रु ३० करोडका लगानीमा निर्माणाधीन सो सभागृहको काम करिब ९० प्रतिशत सम्पन्न भएको जनाइएको छ ।

सङ्घका पूर्वअध्यक्ष नारायणप्रसाद भुसालले बहुउद्देश्यीय सभागृह निर्माण अन्तिम चरणमा पुगेको जानकारी दिए । उनका अनुसार घोराही नगर विकास समितिले दिएको १२ कठ्ठा बढी जग्गामा सभागृह निर्माण सुरु गरिएको थियो । उनले भने, “सभागृह सम्पन्न भएपछि जिल्लालाई आर्थिक दृष्टिकोणले राहत मिल्ने छ ।”