पछिल्लो २४ घण्टामा थप १,३३० जनामा कोरोना पुष्टि

५ असोज, काठमाडौं । नेपालमा पछिल्लो २४ घण्टामा १ हजार ३३० जनामा कोरोना भाइरस संक्रमण पुष्टि भएको छ । सो अवधिमा कोरोना संक्रमणबाट ५ जनाको मृत्यु भएको छ भने १ हजार ८३० जना निको भएका छन् ।

स्वास्थ्य मन्त्रालयका अनुसार ९ हजार ६२६ पीसीआर परीक्षण गर्दा १ हजार ३६ जना र ३ हजार ९६६ एन्टिजेन परीक्षण गर्दा २ सय ९४ गरी १ हजार ३३० जनामा कोरोना भाइरसको संक्रमण देखिएको हो ।

यस्तै आज थपिएका संक्रमितमध्ये काठमाडौं उपत्यकाका ४०२ छन् । काठमाडौंमा २६१, ललितपुरमा ९८ र भक्तपुरमा ४३ जनालाई संक्रमण पुष्टि भएको छ । २४ घण्टामा ५५ हजार २४२ जनाले कोरोना विरुद्धको खोप लगाएका छन् । सक्रिय संक्रमित २१ हजार ५२४ जना रहेका छन् ।