विकास बैंकहरुको निक्षेप संकलन र कर्जा लगानीमा वृद्धि

६ असोज, काठमाडौं । विकास बैंकहरुले एक साताको अवधिमा निक्षेप संकलन र कर्जा लगानी दुवैमा सामान्य विस्तार गरेका छन् ।

डेभलपमेन्ट बैंकर्स एसोसिएसन नेपालको तथ्यांक अनुसार एक साता (भदौ २६ देखि असोज १ गते) सम्मको अवधिमा विकास बैंकको निक्षेप संकलन र कर्जा लगानी बढेको हो ।

राष्ट्रियस्तरका विकास बैंकहरुले गत हप्ता २ अर्ब ४८ करोडले निक्षेप वृद्धि भएको छ । गत हप्ता ४ सय १७ अर्ब ३६ करोड रुपियाँ निक्षेप रहेकोमा असोज १ गतेसम्ममा निक्षेप वृद्धि भएर ४ सय १९ अर्ब ८४ करोड रुपियाँ पुगेको छ ।

विकास बैंकको ऋण भने ५ अर्ब ३९ करोड रुपियाँले बढेको छ । गत भदौ २६ मा ३ सय ६८ अर्ब ८० करोड रुपियाँ रहेको विकास बैंकको ऋण असोज १ गतेसम्म पुग्दा ३ सय ७४ अर्ब १९ करोड रुपियाँ पुगेको छ । साताभरिमा निक्षेपको वृद्धिदर ०.५९ प्रतिशत रहेको छ भने ऋणको वृद्धिदर भने १.४६ प्रतिशतले बढेको छ ।

क्षेत्रीय विकास बैंकहरुको निक्षेप भने गत साता न्यून रुपमा घटेको छ । गत साता ३१ अर्ब ९७ करोड ७७ लाख रुपियाँ रहेको निक्षेप असोज १ गतेसम्म पुग्दा घटेर ३१ अर्ब ९७ करोड ६९ लाख रुपियाँ पुगेको छ । क्षेत्रीय विकास बैंकको ऋण भने १२ करोड ६६ लाख रुपियाँले बढेको छ । अघिल्लो साता २८ अर्ब ८ करोड रुपियाँ रहेको ऋण असोज १ गतेसम्म बढेर २८ अर्ब २० करोड रुपियाँ पुगेको छ ।

समग्रमा १५ विकास बैंकहरुको निक्षेप एक सातामा २ अर्ब ४८ करोड रुपियाँले बढेको छ । गत साता ४ सय ४९ अर्ब ३३ करोड रुपियाँ रहेको निक्षेप बढेर असोज १ गतेसम्ममा ४ सय ५१ अर्ब ८१ करोड रुपियाँ पुगेको छ । एक सातामा समग्र विकास बैंकहरुको ऋण भने ५ अर्ब ५१ करोड ८० लाख रुपियाँले बढेको छ ।