आजदेखि ३३ किलो सुन तस्करीको अन्तिम सुनवाई हुँदै

१० असोज, काठमाडौं । चर्चित ३३ किलो सुन काण्डमा मुछिएका चुडामणी उप्रेती ‘गोरे’ लगायत सनम शाक्य हत्या प्रकरणसँग जोडिएको मुद्धाको आजदेखि अन्तिम सुनुवाई शुरु हुने भएको छ । करिब ३८ क्वीन्टल सुन तस्करी र सनम शाक्य हत्या प्रकरण सम्बन्धी मुद्दाको अन्तिम मोरङ जिल्ला अदालतमा आइतबारदेखि सुरु हुने भएको मोरङ जिल्ला अदालतले जनाएको छ ।

सुन तस्करीका भरियामा मानिएका उर्लाबारीका शाक्य हत्या प्रकरणसँगै जोडिएको मुद्धाको बहस हुने भएको हो । ७७ जना प्रतिवादी रहेको मुद्दामा पहिलो दिन आइतबार सरकारी वकिलले बहस गर्नेछन् । असोज ७ गतेदेखि सुनुवाईका क्रममा रहेको मुद्दामा वादी नेपाल सरकार र प्रतिवादीका कानुन व्यवसायीबीच बहस हुनेछ ।

वादीतर्फबाट मुद्दाको बहसको नेतृत्व उच्च सरकारी वकिल कार्यालय विराटनगरका सहन्यायाधीवक्ता ज्ञानप्रसाद भुसालले गर्ने छन् । उनको नेतृत्वले सुन तस्करीलाई थप पुष्टि गर्ने आधार पेस गर्दै तस्करी एवम् हत्यामा संलग्नलाई कैद सजायको माग दाबीसहितको दलिल इजलासमा प्रस्तुत गर्नेछ । यसका लागि सरकारका तर्फबाट बहस गर्ने कानुन व्यवसायीलाई आइतबार र सोमबार गरी दुई दिनको समय राखिएको छ।

पूर्पक्षका सिलसिलामा जिल्लाबाट उच्च हुँदै सर्वोच्च अदालतसम्म पुगेको सुन तस्करीका मुख्य अभियुक्त मोरङ उर्लाबारीका गोरे भनिने चूडामणि उप्रेतीलाई बनाइएको छ । गोरेको समूहले दुबईबाट २०७४ साल माघ ९ गते तस्करीमार्फत भित्राएको साढे ३३ किलो सुन काठमाडौँ भित्रिएपछि बेपत्ता बनाइएको थियो । बेपत्ता सुन अझै पनि फेला पर्न सकेको छैन । सो घटनामा गोरेको समूहले करेन्ट लगाएर यातना दिँदा २०७४ साल फागुन १८ गते मोरङको उर्लाबारी नगरपालिका–१ मा शाक्यको मृत्यु भयो। शाक्यलाई भरियाका रुपमा प्रयोग गरेको देखिएको छ ।

सरकारी वकिल कार्यालय मोरङले ‘आपराधिक समूह स्थापना र सञ्चालन गरी सुन चोरी पैठारी र चोरी निकासीको अवैध कारोवार, अपहरण तथा शरीर बन्धक र कर्तव्य ज्यान’ गरेर चारवटा शीर्षकमा २०७५ वैशाख १९ गते जिल्ला अदालत मोरङमा मुद्दा दायर गरेको थियो। सो मुद्धामा १७ अर्ब १ करोड ८० लाख ७१ हजार ४ सय रूपैयाँ बराबरको ३७ लाख ९९ हजार पाँच सय ६३ ग्राम ९करिब ३८ क्वीन्टल० सुन अवैध रुपमा आयात गरिएको दाबी गरिएको छ ।

सन् २०१५ देखि २०१६ सम्ममा सो परिणामको सुन तस्करी गरेर नेपाल ल्याइएको अनुसन्धानबाट खुलेपछि त्यही बराबरको बिगो माग दाबीसहितको मुद्दा दर्ता गरिएको थियो। प्रहरीले अनुसन्धान लगत्तै मिसिल बुझाएपछि सरकारी वकिल कार्यालयले अभियोगपत्र तयार गर्दै मोरङ अदालतमा दायर गरेको मुद्दामा उच्चप्रहरी अधिकारीसहित ६३ जनालाई प्रतिवादी बनाइएको थियो । अनुसन्धानका क्रममा थप नयाँ तथ्य खुलेपछि पूरक अभियोग दर्ता गर्दा प्रतिवादी ७७ पुगेका छन । यद्धपी, हालसम्म मुख्य अभियुक्त गोरेसहित ५५ जना मात्रै पक्राउ परेका छन् ।