पोखरा महानगर सभापतिमा पौडेल पक्षका सुरेन्द्रमान बिजुक्छे विजयी

१० असोज, पोखरा । कांग्रेसको १४औँ महाधिवेशनअन्तर्गत गत पोखरा महानगरपालिकाको सभापतिमा सुरेन्द्रमान बिजुक्छे विजयी भएका छन् । पोखरा उद्योग वाणिज्य संघका महासचिवसमेत रहेका बिजुक्छेले अन्य पाँच प्रतिस्पर्धीलाई पछि पार्दै विजयी हासिल गरेका हुन् ।

पोखरा महानगरमा क्षेत्रीय प्रतिनिधि र वडा अध्यक्ष गरी एक हजार तीन सय ७० मतदाता रहेकोमा एक हजार तीन सय ४४ मत खसेको थियो । जसअन्तर्गत बिजुक्छेले चार सय १४ मत प्राप्त गरे । उनका निकटतम् प्रतिस्पर्धी गंगाधर पराजुलीले तीन सय ४६ मत प्राप्त गरे ।

पोखरा-९ का वडा अध्यक्ष रामराज लामिछाने दुई सय नौ, काँग्रेस नेता मिलनप्रसाद तिवारीले एक सय ५३, पोखरा ११ का वडा अध्यक्ष मोहनप्रसाद बास्तोलाले एक सय २७ र पत्रकार ज्योति हमालले ११ मत ल्याए ।

यस्तै उपसभापतिमा प्रयागराज भण्डारी र भवसागर बरालले क्रमशः पाँच सय ६९ र चार सय ६४ मत ल्याएर विजयी भएका छन् । सचिवमा टुवराज बास्तोलाले आठ सय ५८, गणेशबहादुर थापाले सात सय ८९ मतले विजयी भए ।

सहसचिवमा संघर्ष कोइराला र सञ्जय आलेले क्रमशः चार सय ६५ र चार सय ५८ मत प्राप्त गरे । नगर उपसभापतिको लागि कृष्णप्रसाद अधिकारी, निर्दोशविक्रम राणा, प्रयागराज भण्डारी, भवसागर बराल, शिव केसी र राजेन्द्र बराल मैदानमा थिए ।

सचिवका लागि गणेशबहादुर थापा, टुवराज बास्तोला र सुरेन्द्रबाबु तिवारीले तथा सहसचिवका लागि नरेन्द्र बास्तोला, पुष्पराज सिग्देल, रविन कायस्थ, लक्ष्मी बास्तोला, सञ्जय आले र संघर्ष कोइरालाबीच प्रतिस्पर्धा भएको थियो ।